زیاتر لە سێ هەزار و 800 خانەوادەی شەهید لە هەولێر زەوی وەردەگرن

ئاڤا نیوز

 

بەشێکی دیکەی کەس و کاری شەهیدان و ئەنفالکراوان لە سنووری هەولێر زەوی وەردەگرن کە لە چوارچێوەی ئەو 15 هەزار کەسە دەبن کە ئەمڕۆ تیروپشکییان بۆ دەکرێت.

 

وێنە گەورەکە: نزیکەی 30 ساڵە لە حکومەتی هەرێمی کوردستان وەک قەرەبوو زەوی بەسەر کەسوکاری شەهیدان و ئەنفالکراوان، لە پارێزگاکاندا دابەش دەکات، تاوەکو ئێستا بەچەند قۆناغێک هەزاران خانەوادە سوودمەند بوون.

 

لێدوانی فەرمی: داماو محەممەد، بەڕێوەبەری گشتیی شەهیدان و ئەنفالکراوانی هەولێر بە ئاڤای گوت، "ئەمڕۆ سێ هەزار و 846 وارسی شەهیدان و ئەنفالکراوان لە وەرگرتنی زەوی سوودمەند دەبن، ئەمە دوایین ئەپدەیتی ناوەکانە کە مامەڵەکانیان تەواوکردووە و فەرمانی ئەنجوومەنی وەزیرانیان هەیە."

 

ئەمەش بزانە: ئەو وارسانەی ئەمڕۆ زەوییان پێدەدرێت هی قۆناغەکانی شەش، حەوت، هەشت و نۆ ـن، تاوەکو ساڵی 2021 شەش هەزار و 203 پارچە زەوی بە وارسی شەهیدان دراوە و بەشێکیان کراون بە سەنەد.