گەنجێکی ڕۆژئاوای کوردستان لە زێی گەورە خنکا

ئاڤا نیوز

دوای نیوەڕۆی ئەمڕۆ لە زێی گەورە تەرمی گەنجێکی تەمەن 17 ساڵە دۆزرایەوە کە خەڵکی ڕۆژئاوای کوردستان بووە و نیشتەجێی کەمپی دارە شەکرانە.

وێنە گەورەکە: ساڵانە لە وەرزی هاویندا بە هۆی بەرزبوونەوەی پلەکانی گەرماوە، خەڵکێکی زۆر ڕوو لە زێ و مەلەوانگەکان دەکات بۆ خۆ فێنککردنەوە، هەربۆیە ڕووداوەکانی خنکان لە هاویندا زیاد دەکەن.

لێدوانی فەرمی: موقەدەم شاخەوان سەعید، وتەبێژی بەرگری شارستانی هەولێر بە ئاڤا میدیای ڕاگەیاند، کاتژمێر 3:30ـی دوای نیوەڕۆ ئاگادارکراینەوە لە بوونی ڕووداوێکی خنکان لە زیێ گەورە، دوای گەڕانی تیمی ژێر ئاوی خەبات بۆ ماوەی کاتژمێرێک و 15 خولەک تەرمی گەنجەکە دۆزایەوە، ناوی جوان ڕياز حوسێنە و تەمەنی 17 ساڵە، خەڵکی ڕۆژئاوای کوردستانە و خانەوادەکەی لە کەمپی دارەشەکران نیشتەجێن.

ژمارەکان وادەڵێن: موقەدەم شاخەوان سەعید دەڵێت: ئەمساڵ لە سنووری پارێزگای هەولێر 11 ڕووداوی خنکان تۆمار کراون، 10 ڕووداویان لە زێی گەورە و یەکێکیان لە ئاوی ئاقوبان بووە.