بە تۆمەتی سیخوڕیکردن بۆ ئیسرائیل سێ کۆڵبەری کورد لە ڕۆژهەڵاتی کوردستان دەکوژرێن

ئاڤا نیوز

لە مانگی ڕابردوو سێ کۆڵبەری کورد بە تەقەی ڕاستەوخۆی هێزە ئەمنییەکانی ئێران کوژراون، بەرپرسانی وڵاتەکەش تۆمەتی سیخوڕیکردن و گواستنەوەی چەک دەدەنە پاڵ کۆڵبەران.

وێنە گەورەکە: لەگەڵ ئاگربەستی نێوان کۆماری ئیسلامیی ئێران و ئیسرائیل، گوشار و توندوتیژییەکانی دژ بە کۆڵبەران زیاتر بووە، بە جۆرێک لە ماوەی کەمتر لە یەک مانگی ڕابردوودا لانیکەم سێ کۆڵبەری کورد بە تەقەی ڕاستەوخۆی هێزە ئەمنییەکانی ئێران کوژراون.

ڕاگەیێنراوی فەرمی: ڕێکخراوی هەنگاو بۆ مافەکانی مرۆڤ ناسنامەی ئەو کۆڵبەرە کوردانەی ئاشکرا کردووە کە مانگی ڕابردوو کوژراون: 

یەکەم: سەیوان عەبدوڵڵازادە، کۆڵبەری تەمەن 20 ساڵی خەڵکی گوندی "حەوتتاش"ی سەر بە شاری بانە، لەڕێککەوتی 28ـی شەشی 2025 کوژراوە.

دووەم: خالید محەممەدی، تەمەن 23 ساڵی خەڵکی گوندی "ئەنجێنە"ـی سەر بە شاری بانە، لە 8-7-2025 کوژراوە.

سێیەم: پەیام ئەحمەدی، خەڵکی گوندی "بەرقوڕوو"ـی سەر بە شاری سەوڵاوا لە 15-7-2025 کوژراوە.

گۆشەیەکی دیکەی دیمەنەکە: بەگوێرەی ڕێکخراوی هەنگاو بۆ مافەکانی مرۆڤ، ژمارەیەک بەرپرسی ئێران، تۆمەتی وەکو "سیخوڕی بۆ ئیسرائیل و گواستنەوەی کەرەستەی سەربازی"یان داوەتە پاڵ کۆڵبەران و ڕاشکاوانە هەڕەشەیان لێ کردوون.