وەزیری بەرگریی ئیسرائیل: متمانەمان بە ئەحمەد شەرع نییە

ئاڤا نیوز

ڕۆژنامەیەکی ئیسرائیلی لەزاری وەزیری بەرگریی وڵاتەکەوە ئاشکرای دەکات، ''ئیسرائیل متمانەی بە ئەحمەد شەرع، سەرۆککۆماری سووریا نییە''.

وێنە گەورەکە:  هەفتەیەکە شەڕ و پێکدادان لە نێوان خێڵە بەدەوییەکان و چەکدارانی دروز لە سوەیدای سووریا ڕوویداوە و چەکدارە دروزییەکان بە پاڵپشتی ئیسرائیل دژی سوپا و هێزە ئەمنییەکانی حکومەتی سووریا وەستانەوە و  دواجار سەرۆکایەتیی کۆماری سووریا، بەهۆی دۆخی هەستیاری وڵات و لەپێناو پاراستنی گیانی هاووڵاتییان و یەکپارچەیی خاکی سووریا، ئاگربەستێکی گشتگیر و دەستبەجێی لەسەرتاسەری وڵاتدا ڕاگەیاند، بەڵام گرژییەکان هەر بەردەوامن.

زانیاریی بەدەستهاتوو: ڕۆژنامەی 'جیروزالیم'، لەزاری یسرائیل کاتز وەزیری بەرگریی ئیسرائیل بڵاوکردووەتەوە، ''ئیسرائیل متمانە بە سەرۆکی سووریا نییە، ئاماژەی بەوەشکرد، ئەو گرووپانەی ئەمڕۆ دروزەکان دەکەنە ئامانج، سبەی ئیسرائیل دەکەنە ئامانج''.

زانیاریی زیاتر: کاتز لە لێدوانێکی دیکەیدا ئاماژەی بەوەشکرد لەگەڵ پیت هێگسێس هاوتا ئەمریکییەکەی ڕێککەوتن بۆ هەنگاونان بۆ ئەوەی ڕۆژهەڵاتی ناوەڕاست ببێتە شوێنێکی سەلامەتتر بۆ بەرژەوەندییەکانی ئیسرائیل و ئەمریکا، هاوکات هێمای بۆ ئەوەکرد کە کۆبوونەوەیەکی بەرهەمداریان لە پنتاگۆن لەگەڵ هاوتا ئەمریکییەکەی ئەنجامداوە، کە باسیان لە پرسە ناوچەیی و ستراتیژییەکان کردووە