مەزارگەیەکی گرنگی دروزەکان لە ڕیفی دیمەشق دەتەقێنرێتەوە

ئاڤا نیوز

چەند کەسێکی نەناسراو مەزاری شێخ عەبدوڵڵا لە شارۆچکەی بەین جن لە ناوچەی جەبەل ئەلشێخ لە ڕیفی دیمەشق دەتەقێننەوە.

ڕاگەیێنراوی فەرمی: ڕوانگەی سووری بۆ مافەکانی مرۆڤ ڕایگەیاند: ئەم کارە لە چوارچێوەی هەوڵە بەردەوامەکانی ڕێکخراوە تووندڕەوەکان دێت بۆ هاندانی ململانێی تائیفی و بە ئامانجگرتنی سیمبولە ئاینییەکانی پێکهاتەکان لە سووریا، هاوکات هۆشداریشی دا لە مەترسی بۆ ئەم جۆرە کردەوانە کە هەڕەشە لە پەیکەری کۆمەڵایەتی سووریا دەکات.

زانیاریی زیاتر: مەزارگەی شێخ عەبدوڵڵا یەکێکە لە دیارترین مەزارگە ئاینییە مێژووییەکان لەنێو کۆمەڵگەی دروزەکان لە سووریا و لوبنان، هەروەها پێگەیەکی مەعنەوی گەورەی هەیە بەو پێیەی دەگەڕێتەوە بۆ یەکێک لە سۆفی و کەسایەتییە ناسراوەکانی ناوچەکە.

ئەوەی پێویستە بیزانیت: لە ڕۆژانی ڕابردوودا شەڕ و پێکدادان لەنێوان خێڵە بەدەوییەکانی عەرەب و چەکدارەکانی دروز لە پارێزگای سوەیدا ڕووی دا و سەدان کەس بوونە قوربانی.