بەندکراوێکی سیاسیی کورد لە ڕۆژی ئازادکردنیدا بەشێوەیەکی گوماناوی گیان لەدەست دەدات

ئاڤا نیوز

 

بەندکراوێکی سیاسیی کورد لە دوایین ڕۆژی تەواوبوونی ماوەی دەستگیرکردنەی لە بەندیخانەی ناوەندیی مەهابادی ڕۆژهەڵاتی کوردستان گیانی لەدەست دا.

 

بڵاوکراوەی فەرمی: ڕێکخراوی مافی مرۆڤی هەنگاو بڵاویکردەوە، قادر ڕەسووڵ پوور، بەندکراوی سیاسیی کورد بەشێوەیەکی گوماناوی لە دوایین ڕۆژی سزای شەش مانگ بەندکردنیدا لە بەندیخانە گیانی لەدەست داوە، بنەماڵە و کەسوکارەکەی جەختیان کردووتەوە لەوەی ئەو بەندکراوە هیچ کێشە و نەخۆشییەکی درێژخایەنی نەبووە، ڕۆژی چوارشەممە لە چاوپێکەوتنی لەگەڵ بنەماڵەکەیدا پێی گوتبوون کە دوو ڕۆژی دیکە ئازاد دەکرێت، بەڵام لە ڕۆژی ئازادکردنیدا تەرمەکەی بۆ پزیشکی دادی ئورمیە گواستراوەتەوە.

 

زانیاریی زیاتر: بەگویرەی ڕێکخراوی مافی مرۆڤی هەنگاو، ڕۆژی هەینی 18-7-2025، قادر ڕەسووڵ پووری تەمەن 53 ساڵ و خەڵکی مەهاباد، چەند کاتژمێریک بەر لە ئازادکردنی لە بەندیخانە گیانی لەدەست داوە، بنەماڵەکەی دوای چەند کاتژمێر دواکەوتنی ئازادکردنی ئەو بەندکراوە سیاسییە، پەیوەندیی تەلەفۆنییان بە بەندیخانەوە کردووە، لە وەڵامدا پێیان گوتراوە کە ناوبراو "لە کاتی حەمامکردندا بەهۆی گرژی" گیانی لەدەست داوە.

 

باکگراوند: قادر ڕەسووڵ پوور ڕۆژی شەممە 8-2-2025، لە ئەنجامی هێرشی هێزە ئەمنییەکان بۆ سەر ماڵەکەی لە گەڕەکی پشت ‌تەپیی مەهاباد دەستبەسەر کرا، بە تۆمەتی "پڕۆپاگەندەی دژ بە حکومەت" سزای شەش مانگ بەندکردنی بەسەردا سەپێندرابوو.