پاسەوانانی بەرپرسێک بە چەک مامەڵە لەگەڵ کەسوکاری قوربانییەکانی کوت دەکات

ئاڤا نیوز

لەپرسەی یەکێک لەقوربانییانی ئاگرەکەی شاری کوت، پاسەوانانی بەرپرسێک بە چەک هێرش دەکاتە سەر کەسوکاری ئەو قوربانییە دوای ئەوەی گرژی لەنێوانیان دروست دەبێت. 
 
چیرۆکی سەرەکی: لە تۆڕە کۆمەڵایەتییەکان بەشێک لە چالاکوانان گرتەیەکی ڤیدیۆییان بڵاوکردووەتەوە کە تێیدا دەردەکەوێت پاسەوانانی بەرپرسێک بە چەک ڕووبەڕووی کەسوکاری یەکێک لە قوربانییانی کارەساتەکەی کوت دەبێتەوە.

ڕاگەیێنراوی فەرمی: بەگوێرەی چالاکوانان، بەرپرسێکی حکومەتی خۆجێیی پارێزگای واست سەردانی پرسەی یەکێک لە قوربانییانی مۆڵەکەی کوتی کردووە، کاتێک کەسوکاری قوربانییەکە ئامادەنەبوون پێشوازی لێبکەن، پاسەوانەکانی بەچەک ڕووبەڕوویان دەبنەوە بەڵام خەڵکەکە نێوەندگیری دەکەن و ناهێڵن بەکاری بهێنن.

لەلایەکی دیکەوە: شایەتحاڵێک بۆ ئاڤا ڕوونیکردەوە کە پێشتر کەسوکاری ئەو قوربانییانە داوایان لەبەرپرسان کردبوو ئامادەی پرسەکە نەبن، چونکە ئەوان بەتاوانباری سەرەکی کارەساتەکە دەزانن، بەڵام ئەو بەرپرسە وەک گێچەڵێک بۆ پرسەکە هاتبوو، ئەمەش هۆکاری گرژیەکەی نێوان هەردوولا بوو .