حەوزێکی گەورە بۆ گڵدانەوەی ئاو لە دەربەندیخان دروست دەکرێت

ئاڤا نیوز

 

هاونیشتمانیانی دەربەندیخان گرفتی کەمی ئاویان هەیە و ئاڤا زانیاریی لەبارەی دروستکردنی حەوزێکی گەورەی گلدانەوەی ئاو لە شارەکە ئاشکرا دەکات.

 

چیرۆکی سەرەکی: هاونیشتمانیانی دەربەندیخان کێشەی کەمئاویان هەیە، داوا لە ئاڤا میدیا دەکەن بەدواداچوون بۆ پرسەکە بکات، ئاڤا میدیا دەنگی هاونیشتمانیان دەگەیێنێتە لایەنی پەیوەندیدار و هەوڵەکان بۆ چارەسەرکردنی کێشەکە ئاشکرا دەکات. 

 

لێدوانی فەرمی: سلێمان محەممەد، قایمقامی دەربەندیخان بە ئاڤای ڕاگەیاند: هەندێک کەس بە زیادەڕۆیی ئاویان ڕاکێشاوە و ئەمەش کاریگەریی نەرێنی لەسەر ئاوی ماڵان دروست کردووە، بۆ چارەسەرکردنی گرفتەکە دوو ماتۆڕی گواستنەوەی و خێراکردنی پڕۆسەی ناردنی ئاومان بۆ فەرمانگەی ئاوی دەربەندیخان دابینکردووە، تاوەکو گەیاندنی ئاو بە ماڵان زیاتر بکەین.

 

ئەوەی پێویستە بیزانیت: بە گوتەی قایمقامی دەربەندیخان: سبەی دەست بە دانانی دوو ماتۆرەکە دەکرێت، هەفتەی داهاتوو بەرهەمهێنانی ئاو بۆ دەربەندیخان زیاتر دەکرێت و بەشێکی زۆری گرفتەکە چارەسەر دەبێت.

 

زانیاریی زیاتر: دەربەندیخان خاوەنی دوو حەوزی گڵدانەوە و دابینکردنی ئاوە بۆ ماڵان، قایمقامییەتی دەربەندیخان لە پلانیدایە ساڵی داهاتوو حەوزیکی دیکە بە گوژمەی ملیاریک و 700 ملیۆن دینار دروست بکات، تاوەکو کێشەی کەمئاوی لە دەربەندیخان چارەسەر بکات.