دوو پزیشكی کورد بڕوانامە لە بەناوبانگترین کۆلێژی پزیشکیی جیهان به‌ده‌ست دەهێنن

ئاڤا نیوز

دوو پزیشكی سلێمانى لە کۆلێژی شاهانەی بەریتانیا بۆ نەخۆشییە هەناوییەکان بڕوانامەی پسپۆڕییان بەدەستهێناوە، سەرۆکی کۆلێژەکەش پیرۆزباییان لێ دەکات.

چیرۆکی سەرەکی: لە چەند ڕۆژی ڕابردوودا دوو پزیشکی کورد کە خەڵکی سلێمانین، بەناوەکانی دکتۆر کامەران حەسەن و دکتۆر کاروان هەمزە، لە لەندەنی بەریتانیا، لەبەناوبانگرتین کۆلێژی پزیشکی لەسەر ئاستی جیهان بڕوانامەیان وەرگرت.

لێدوانی فەرمی: د. کاروان هەمزە دەڵێت: ئەو پسپۆرییەی بەدەستمانهێناوە لەبواری نەخۆشییە هەناوییەکانە. هەروەها ئەو کوردانەی لەم کۆلیژە بڕوانامە وەردەگرن، لە پەنجەکانی دەست تێپەڕ ناکەن. 

- هەر کەسێک لەم کۆلێژە بڕوانامە وەربگرێت، بڕوانامەکەی کوردستانی هاوتا دەکرێت لەگەڵ بڕوانامەی بەریتانیا و دەتوانێت لە هەموو شوێنێک وەک پزیشک نەخۆش چارەسەر بکات.

- شێوازی وەرگرتن لەم کۆلێژە بەجۆرێکە، کاتێک هەر کەسێک داواکاری پێشکەش دەکات بۆئەوەی لە کۆلێژەکە وەربگیرێت، سێ تاقیکردنەوەی پێ دەکەن، دووانیان بە تیۆرییە و یەکێکیان بە کرداری.

- ئەوەی بە کرداری دەکرێت، لەلایەن 20 پزیشکی بەریتانیا تاقیکردنەوەی پێ دەکەن.

ئەوەی پێویستە بیزانیت: کۆلێژی شاهانەی بەریتانیا لە 15 وڵات زیاتر لقییان هەیە، نزیکەی 40 هەزار ئەندامییان هەیە و ئەم دوو پزیشکە کوردەش ئەندامی ئەم کۆلیژەن. 

زانیاریی زیاتر: کۆلێژی شاهانەی بەریتانیا لە چەندین بوار قوتابی پێ دەگەیەنێت، وەکو بورای "سەربازی، پزیشکی و میوزیک".