فایلی خەڵک؛ ئاڤا به‌دواداچوون بۆ گازنده‌ى دانیشتووانى گەڕەکێکی هەولێر ده‌كات

ئاڤا نیوز

دانیشتوانی یەکێک لە گەڕەکەکانی هەولێر گازندەی ئەوەیان هەیە، کەسێک لەبەر باڵەخانەکەی خۆی، شوێنی سوڕانەوەی ئۆتۆمبێلی داخستووە و ئەمەش بووەتە هۆکاری دوورخستنەوەی ڕێگاکەیان. 

چیرۆکی سەرەکی: بەهۆی زیادبوونی ژمارەی ئۆتۆمبێل لە شاری هەولێر زۆرجار هاتووچۆ وەکو ڕێکارێکی سەرەتای و پێشگرتن لە بەردەوامی ڕووداوەکان، چاکسازی لە شوێنی سووڕانەوەی شەقامەکان دەکات بەڵام زۆرجار ئەوەش ناڕەزایەتیی خەڵکی لێدەکەوێتەوە. 

لێدوانی فەرمی: سەید نیهاد، دانیشتووی 32 پارکی هەولێرە و قسەی بۆ ئاڤا کردووە و دەڵێت: کەسێکی شوێنی سووڕانەوەی لە بەرژەوەندی خۆی داخستووە، ئەمەش بۆ ئەوەیە کە نرخی زەوییەکەی بەرزبێتەوە و قەرەباڵغی دروست نەبێت. 

بۆچوونی لایەنی بەرامبەر: سروە یاسین، بەڕێوەبەری ئەندازەی هاتوچۆی هەولێر بە ئاڤای ڕاگەیاند: پێشتر لەو شەقامە ڕووداوی هاتووچۆی زۆر ڕوویداوە، بۆیە لەلایەن شارەوانی و هاتووچۆوە داخراوە، ئێستا هەوڵی چارەسەرکردنی ئەو کێشەیە دەدەین و جارێ بڕیاری داخستنەکە ڕادەگرین.