كچێكی دیكەی ئێزدی دوای 11 ساڵ لە ڕفاندنی ڕزگار دەكرێت

ئاڤا نیوز

دوای 11 ساڵ لە ڕفاندنی لەلایەن چەكدارانی ڕێكخراوی تیرۆریستیی داعش، كچێكی ئێزدی ڕزگار دەكرێت.

زانیاریی بەدەستهاتوو: كچەكە ناوی ڕیهام حەجی حەمێیە و لە ساڵی 2014 لە كاتی هێرشی چەكدارانی ڕێكخراوی تیرۆریستیی داعش بۆ سەر شنگال ڕفێندراوە، ئەمڕۆ دوای 11 ساڵ لە دەستبەسەركردنی، ڕزگار كرا و گەڕێندرایەوە نێو خێزان و كەسوكارەكەی.

زانیاریی زیاتر: ڕیهام ئێستا تەمەن 21 ساڵە و ئەو كاتەی لەلایەن چەكدارانی داعشەوە ڕفێندراوە تەمەنی تەنیا 10 ساڵ بووە.

ژمارەکان وا دەڵێن: ئاماری نوسینگەی ڕزگاربووانی دەستی داعش دەریدەخات، ئەو کاتەی چەکدارانی داعش شنگال و گوندەکانی دەورووبەریان داگیرکرد، شەش هەزار و 417 ژن و پیاویان ڕفاند، لەو ژمارەیە سێ هەزار و 548 کەسیان ژن و کچ بوون، تاوەكوو ئێستا توانراوە نزیكەی سێ هەزار و 600 ژن و پیاو و منداڵ ڕزگار بکرێن.

ئەوەی پێویستە بیزانیت: دوای 10 ساڵ، هێشتا نزیكەی دوو هەزار و 590 ژن و پیاوی ئێزدی ڕفێنراو چارەنووسیان نادیارە.