وەزارەتی دارایی وردەکاریی پرۆژەی هەژماری من دەخاتەڕوو

ئاڤا نیوز

 

وەزارەتی دارایی هەرێمی کوردستان ڕاگەیێنراوێکی لەبارەی پرۆژەی هەژماری من بڵاوکردەوە و دەڵێت، ماوەیەکە هەواڵی ناڕاست دژی پرۆژەکە بڵاودەکرێنەوە و بە پێویستمان زانیوە ڕوونکردنەوە بدەین. 

 

ڕاگەیێنراوی فەرمی: "پرۆژەی هەژماری من بە هەماهەنگی وەزارەتی دارایی و بە ئاگاداری سەرۆکوەزیرانی عێراق و بە ڕەزامەندی بانکی ناوەندی لە سەرتاسەری هەرێمی کوردستان جێبەجێ دەکرێت؛ ئەمەش بۆ دروستکردنی بانک نییە بەڵکو بە ئامانجی دابینکردنی ڕێگەیەکی گونجاوە بۆ دەستگەیشتن بە چەندین خزمەتگوزاریی دارایی".

 

بۆچی گرنگە؟ لەڕێگەی ئەم پرۆژەیەوە مووچەخۆران هەر مووچە نا، لە چەندین جۆری قەرز و پێشینە سوودمەند دەبن. پرۆژەکەش ڕێگری لە سپیکردنەوەی پار دەکات و گەندەڵی کەم دەکاتەوە.

 

ئەمەش بزانە: ئێستا پێنج بانک بەشدارییان لە پرۆژەکەدا کردووە، بەڵام سێ بانکی دیکەی باوەڕپێکراو لەسەر هێڵن بۆ ئەوەی بەشداری بکەن؛ داواکاری هەندێک بانکیش ڕەتکراوەتەوە، چونکە لەلایەن وەزارەتی گەنجینەی ئەمریکا سزایان لەسەر بووە.

 

ئەوەی پێویستە بیزانیت: بەپێی بڕیاری بانکی ناوەندی، پێویستە سەرمایەی هەر یەک لە بانکە بەشدارەکان، لە 250 ملیار دینارەوە زیاد بکرێت بۆ 400 ملیار دینار، بەمەش مووچەخۆران لە پارێزراوی مووچەکانیان دڵنیا دەبن.

 

چەند زانیارییەک لەبارەی پڕۆژەی هەژماری من:

 

- بەشداربووان لە 19 خزمەتگوزاریی بانکی سوودمەند دەبن.

- تێچووی مانگانەی سەرجەم خزمەتگوزارییەکان 2500 دینارە. 

- لە سەرتاسەری هەرێمی کوردستاندا 1000 ئامێری ڕاکێشانی پارە دادەنرێت.

- ئامێرەکان 24 کاتژمێر کار دەکەن و ناوەستن.

- تاوەکو کۆتایی ئەمساڵ، ملیۆنێک مووچەخۆر تۆمار دەکرێن.

- ژمارەی بانکە بەشداربووەکان لە زیادبووندایە.

- بەشداربووان ئازادن لە گۆڕین و هەڵبژاردنی بانک بە مەرجێک بەشداری پرۆژەکەی کردبێت.

- جگە لە بەشداربوو، هیچ کەسێکی دیکە ناتوانێت دەستکاری هەژماری مووچەخۆر بکات.

- بەشداربووان بەپێی قەبارەی مووچەکەیان لە قەرز و پێشبینەکان سوودمەند دەبن.