هەسەدە شانەیەکی داعش لە کەمپی هۆل هەڵدەوەشێنێتەوە

ئاڤا نیوز

هێزەکانی سوریای دیموکرات، بە پشتیوانیی هاوپەیمانیی نێودەوڵەتی، لە ئۆپەراسیۆنێکی ئەمنیدا شانەیەکی نووستووی ڕێکخراوی داعشیان لە کەمپی هۆل هەڵوەشاندەوە و دوو ئەندامی باڵای ڕێکخراوەکەیان دەستگیرکرد کە بەرپرس بوون لە چالاکییە ئەمنییەکان.

وێنە گەورەکە: کاتێک داعش لە عێراق و سووریا ڕووخا، چەکدارانی داعش و خێزانەکانیان و لایەنگر و ئەندامەکانیان لە کەمپی هۆل لە ڕۆژئاوای کوردستان کۆکرانەوە، سەرەتا لەژێر چاودێری چڕ و ورددا بوو لە لایەن ئەمریکاوە، دواتر چاودێریکردن و بەڕێوەبردنەکەی درایە دەست هەسەدە و ئەمریکاش لە هێڵی دووەم چاودێری دەکردن.

ڕاگەیێنراوی فەرمی: ناوەندی ڕاگەیاندنی یەکینەکانی پاراستنی گەل (یەپەگە) ئەمڕۆ، 30ـی تەمموزی 2025، لە ڕاگەیەندراوێکدا وردەکاریی ئۆپەراسیۆنەکەی ئاشکرا کرد و ڕایگەیاند، یەکەی ئۆپەراسیۆنە سەربازییەکان (TOL)ـی سەر بە هەسەدە لە 28ـی تەمموزدا ئۆپەراسیۆنێکی ورد و سەرکەوتووی لەناو کەمپی هۆل ئەنجام داوە. ئۆپەراسیۆنەکە بووە هۆی دەستگیرکردنی دوو ئەندامی داعش کە بەشێک بوون لە پێکهاتەی سەرکردایەتیی ڕێکخراوەکە.

زانیاریی زیاتر: هەردوو ئەندامە دەستگیرکراوەکە پێشتر بەشدارییان لە ئۆپەراسیۆنەکانی ڕێکخراوەکەدا کردبوو لە هەردوو وڵاتی عێراق و سووریا، لەناو کەمپەکەدا بەردەوام بوون لەسەر چالاکییەکانیان بەمەبەستی پاراستنی نفوزی داعش و ئەنجامدانی کاری ئەمنی.

لە کۆتایی ڕاگەیەندراوەکەدا، هەسەدە جەختی کردەوە کە ئەم ئۆپەراسیۆنە "ڕەنگدانەوەی بەردەوامیی هەوڵەکانە بۆ هەڵوەشاندنەوەی تۆڕەکانی ڕێکخراوەکە و دڵنیابوون لە پاراستنی ناوچەکانمان لە هەر ئەگەرێکی سەرهەڵدانەوەی تیرۆر."