پلاندانانی هەرێمی كوردستان: لە ناوەڕۆكی ڕاپۆرتی هەژاریی لە عێراق ئاگادار نین

ئاڤا نیوز

وەزارەتی پلاندانانی هەرێمی كوردستان، نیگەرانە لە ڕاگەیاندنی ڕاپۆرتی هەژاریی فرەڕەهەند لەلایەن عێراقەوە، بریكاری وەزارەتەكە دەڵێ ئێمە لە ناوەڕۆكی ڕاپۆرتەكە ئاگادار نین و پەسەندی ناكەین.

چیرۆكی سەرەكی: وەزارەتی پلاندانانی عێراق ڕاپۆرتی تایبەت بە هەژاریی فرەڕەهەندی بڵاوکردەوە، بەگوێرەی ڕاپۆرتەکەش ساڵی 2018 ڕێژەی هەژاری فرەڕەهەند 11.4% بووە، بەڵام ساڵی ڕابردوو ڕێژەکە بۆ 10.8% دابەزیووە، ڕێژەی هەژاریش لەسەر بنەمای ماددی لە وڵاتدا 17.5%ـە، بەپێی ناوەڕۆكی ڕاپۆرتەكە، لەڕووی کەمی هەژارییەوە هەولێر یەکەم پارێزگای عێراقە و تەنیا 5.9%ـی خەڵکی پارێزگاکە هەژارن، لەکاتێکدا 43.6%ـی خەڵکی پارێزگای مووسەننا لە باشووری وڵات، لە خوار هێڵی هەژارییەوەن.

لێدوانی فەرمی: سیروان محەممەد، بریكاری وەزارەتی پلاندانانی کوردستان بە ئاڤای ڕاگەیاند: ڕاپۆرتەكە بە هاوكاریی زانكۆی ئۆكسفۆرد و ڕێكخراوی پەرەپێدانی سەر بە نەتەوە یەكگرتووەكان ئامادە كراوە، بەڵام وەزارەتی پلاندانانی عێراق هەرێمی كوردستان و  وەزارەتی پلاندانانی ئاگادار نەكردووەتەوە، ئێمە بەشدار نەبووینە، ئەمە لەكاتێكدایە كە لە ساڵی 2019ـەوە بەشداریمان كردووە لە هەموو ئەو ڕاهێنانانەی كە بۆ دروستكردنی ڕێبەری هەژاریی فرەڕەهەند بەڕێوەچوونە.

٠ هەوڵمان دا بەغدا لە نیگەرانییەكانمان تێبگەیەنین، بەڵام وەڵامەكانیان لای ئێمە تاوەكوو ئێستا جێگەی قبووڵ نییە، پێشمان ڕاگەیاندوون كە ئێمە ئەم شێوە مامەڵەیە ڕەتدەكەینەوە و هەوڵ دەدەین ئێمەش لەمەودوا بەهەمان شێوە مامەڵەیان لەگەڵ بكەینەوە.

٠ ئێمە ئاگامان لە ناوەڕۆكی ڕاپۆرتەكە نییە، پێشووتر دەبوو ئێمە ئاگادار بكرێنەوە  پێشتر بەشدار و ئامادەی ڕێوڕەسمی ڕاگەیاندنەكەی دەبووین بەڵام ئەمجارە بێ ئێمە كرا.

٠ تاوەكوو ئێستا پەیوەندیمان لەگەڵ وەزارەتی پلاندانانی عێراق باش بوو و هەماهەنگ بووین ئەمەی ئێستا پێشهاتێكی نوێیە لە پەیوەندییەكانی نێوانمان.