تەرمی منداڵێکی 10 ساڵە لە زێی گەورە دۆزرایەوە

ئاڤا نیوز

ئەمڕۆ هەینی تیمەکانی بەرگری شارستانی هەولێر تەرمی منداڵێکی 10 ساڵەیان لە زێی گەورە دەرهێنا، کە لەگەڵ خانەوادەکەی بۆ گەشت سەردانی ئەو ناوەیان کردبوو.

وێنە گەورەکە: ساڵانە لە وەرزی هاوین بەهۆی بەرزبوونەوەی پلەکانی گەرما، خەڵک ڕوو لە کەنار زێی و مەلەوانگەکان دەکەن، بۆیە ڕووداوەکانی خنکان زیاد دەکەن.

لێدوانی فەرمی: موقەدەم شاخەوان سەعید، وتەبێژی بەرگریی شارستانیی هەولێر بە ئاڤا میدیای ڕاگەیاند، کاتژمێر 2ـی دوای نیوەڕۆی ئەمڕۆ هەینی منداڵێکی تەمەن 10 ساڵە لە زێی گەورە خنکا، تیمی ژێر ئاوکەوتنی قەندیل تەرمی منداڵەکەیان دەرهێنا و ڕەوانەی پزیشکی دادی هەولێر کرا.

ئەوەی پێویستە بیزانیت: بەگوێرەی ئاماری بەرگریی شارستانیی هەولێر، ئەمساڵ تا ئێستا 13 ڕووداوی خنکان ڕوویداوە و 25 کەسیش لە خنکان ڕزگار کراون. ئەم ئامارە بەراورد بە ساڵی ڕابردوو  20 ڕووداو کەمی کردووە ساڵی پار تا ئەم کاتە 33 ڕووداوی خنکان ڕوویدا بوو.