لیژنەیەكی دیكەی تایبەتمەند بۆ لێكۆڵینەوە لە هێرشە درۆنییەكان گەیشتە هەولێر

ئاڤا نیوز

لەبارەی هێرشە درۆنییەکانی سەر کێڵگە نەوتییەکانی هەرێمی کوردستان، لیژنەیەکی تایبەتمەند لە بەغداوە گەیشتە هەولێر؛ لێکۆڵینەوە لە چۆنییەتیی هێرشەکان دەکەن و بەڵگەنامەكان كۆ دەكەنەوە و ڕاپۆرتێك ئامادە دەكەن.

وێنە گەورەكە: دوای ئەوەی هەفتەی ڕابردوو لیژنەیەكی تایبەتمەند بە سەرۆكایەتی قاسم ئەعرەجی، ڕاوێژكاری ئاسایشی نیشتمانیی عێراق سەردانی پایتەختی هەرێمی كوردستانیان كرد و بە شێوەیەكی مەیدانی لەگەڵ لایەنە ئەمنییەكانی هەرێمی كوردستان شوێنە زیانلێكەوتووەكانی كێڵگە نەوتییەكانیان بەسەركردەوە، ئەمڕۆ شەممەش لیژنەیەكی دیكەی تایبەتمەند بەمەبەستی چڕكردنەوەی لێكۆڵینەوەكان هاتوونەتە هەولێر و لە نزیكترین كاتدا ڕاپۆرتێك لەبارەی وردەكاریی هێرشەكان ئامادە بكەن.

زانیاریی پەیامنێر: هیشام سەعید، پەیامنێری ئاڤا میدیا لە هەولێر ڕایگەیاند، ئەو لیژنە تایبەتمەندەی ئەمڕۆ هاتووەتە هەولێر بەراورد بە لیژنەكەی هەفتەی ڕابردوو ئەوەیە؛ بەشێوەیەكی چڕتر لێكۆڵینەوە لە هێرشە درۆنییەكان دەكەن و ڕاپۆرتێك ئامادە دەكەن لەبارەی دەرئەنجامی لێكۆڵینەوەكان، لە هەرێمی كوردستانیش لیژنەیەكی ئەمنی هاوكاریان دەبن بە مەبەستی دۆزینەوەی ئاڕاستەی هەڵدانی درۆنەكان و وردەكارییەكانی دیكە.

هیشام باسی لەوەشكرد، لیژنەكە دوور لە چاوی میدیاكان سەردانی هەرێمی كوردستانی كردووە و كارەكانی لێكۆڵینەوەش بە نهێنی بەڕێوەدەچن. 

باكگراوند: تەنها لە مانگی تەمموزی ڕابردوودا، هەرێمی كوردستان ڕووبەڕووی 20 هێرشی درۆنی بوویەوە، كە ئاڕاستەی ژێرخانی وزە كرابوون، بەهۆیەوە ئاستی بەرهەمهێنانی نەوت لە كێڵگە نەوتییەكان بە ڕێژەیەكی بەرچاو دابەزی، ئەمەش كاریگەریی نەرێنی لەسەر دۆخی ئابووریی هەرێمی كوردستان دروستكرد.