فایلی خەڵک؛ بێ ئاوی و بێ کارەبایی دانیشتووانی گەزنەی هەراسان کردووە

ئاڤا نیوز

دانیشتووانی گوندی گەزنە لە هەولێر بەدەست بێ ئاوی و بێ کارەبایی دەناڵێنن و داوای چارەسەر دەکەن، بەرپرسانی ئاو و کارەباش بەڵێنی چارەسەر دەدەن لە زووترین کاتدا.

چیرۆکی سەرەکی: دانیشتووانی گوندی گەزنەی سەر بە پارێزگای هەولێر، بەدەست قەیرانی کەمئاوی و کەمیی کارەبای نیشتمانییەوە دەناڵێنن، کە وایکردووە هەندێکیان بە ناچاری ماڵەکانیان جێبهێڵن و هۆکارەکەشی بۆ تەجاوزکردنە سەر سەرچاوەی ئاوەکەیان دەگەڕێننەوە.

لێدوانە فەرمییەکان: وەحید محەممەد، یەکێک لە دانیشتووانی گوندەکە، باس لە سەختیی دۆخەکە دەکات و بە ئاڤای وت: "جاری وا هەیە بە چەند ڕۆژ و بە هەفتە ماڵەکەم بەجێدەهێڵم بەهۆی بێ ئاوییەوە. ئەمە جگە لە کەمیی کارەبا، کە بەم گەرمایە ئاو و کارەبات نەبێت چۆن دەتوانی لە ماڵێکدا بژیت"

نەشوان یونس، هاووڵاتییەکی دیکەی گوندەکە، بە ئاڤای وت: "کێشەکە کۆمەڵێک خاوەن زەوی کشتوکاڵی دروستیان کردووە، چوون هێڵی ئاوی تەجاوزیان لە بیری ئاوی گوندەکەمان ڕاکێشاوە، ئەمەش بووەتە هۆی ئەوەی ئاو نەگاتە ماڵەکانمان و ناچاربین بە تانکەر بیکڕین."

بۆچوونی لایەنی بەرامبەر: تۆڵە مەهدی، بەڕێوەبەری ناحیەی بەحرکە، دڵنیایی دەدات کە لە هەوڵدان بۆ چارەسەری کێشەکە و بە ئاڤای وت: "بۆ کێشەی کارەباکە بەردەوام لەگەڵ بەڕێوەبەری کارەبای هەولێر لەسەر هێڵین و هەوڵی جددی دەدەین چارەسەر بکرێت. بە چارەسەرکردنی کێشەی کارەبا ڕاستەوخۆ کێشەی ئاویش چارەسەر دەبێت، چونکە کارپێکردنی بیری ئاوەکە پێویستی بە کارەبایە.

هاوکات، ڕابەر حوسێن، بەڕێوەبەری ئاوی هەولێر، بەڵێنێکی درێژخایەنتر دەدات و دەڵێت، "لەگەڵ تەواوبوونی قۆناغی دووەمی پڕۆژەی فریاگوزاریی خێرای ئاوی هەولێر، کێشەی ئاوی تەواوی گەڕەک و گوند و قەزا و ناحیەکانی هەولێر چارەسەر دەبێت."