سەرۆکایەتیی پەرلەمانی عێراق و بەشێک لە سەرۆک فراکسیۆنەکان سێ بڕیاری هاوبەشییان دەرکرد

ئاڤا نیوز

سەرۆکایەتیی پەرلەمانی عێراق و سەرۆک فراکسیۆنەکان کۆبوونەوە و بڕیاریاندا دانیشتنەکانی پەرلەمان بەگوێرەی پەیڕەوی ناوخۆ دەستپێبکەنەوە و لەمەودواش کارنامەی دانیشتنەکان بە ڕێککەوتن و ڕەچاوکردنی بەرژەوەندی هەمووان دادەنرێت.

چیرۆکی سەرەکی: چەندین هەفتەیە پەرلەمانی عێراق بەهۆی ئامادەنەبوونی زۆرینەی پەرلەمانتاران و نەبوونی نیسابەوە ناتوانێت کۆبوونەوە بکات، ناوەڕاستی مانگی ڕابردووش فراکسیۆنی تەقەدووم کە گەورەترین فراکسیۆنی سوننەکانە بڕیاریدا بایکۆتی دانیشتنەکانی پەرلەمان بکات بەهۆی ئەوەی لایەنەکان پابەندی کارنامەی دانیشتنەکان نابن و لەناو کۆبوونەوەکاندا بڕگەی نوێ زیاد دەکەن.

ڕاگەیێنراوی فەرمی: ئەمڕۆ شەممە سەرۆکایەتی پەرلەمانی عێراق و سەرۆک فراکسیۆنەکان کۆبوونەوە و بەمەبەستی کاراکردنەوەی دامەزراوەی یاسادانان، لەسەر سێ بڕیار ڕێککەوتن.

یەکەم: جەختکردنەوە لە پێویستی ئەنجامدانی کۆبوونەوەکان بەشێوەیەکی ڕێک و پێک، چونکە ئەوە بەرپرسیاریەتی دەستووریی و نیشتیمانییەکان و ناکرێت دوابخرێن.

دووەم: داوا لەو فراکسیۆنانە دەکەین کە بایکۆتی کۆبوونەوەکانیان کردووە بەشداری دانیشتنەکان بکەن، دوای ئەوەی ڕێککەوتتنی گشتگیر لەسەر بەرنامەی کاری دانیشتنەکان کرا، لەم بوارەشدا ڕەچاوی بەرژەوەندی هەمووان و کاری لەپێشینەی قۆناغەکە دەکرێت.

سێیەم: سەرۆکایەتیی پەرلەمان هەڵدەستێت بە جێبەجێکردنی پەیڕەوی ناوخۆ بەرامبەر ئەو پەرلەمانتارانەی بەبێ پاساو ئامادەی دانیشتنەکان نابن، ڕێکارەکانیش تا دوورخستنەوەیان لە پەرلەمانتاری بەردەوامیی دەبێت، ئەوەش لەپێناو هێشتنەوەی کارایی پەرلەمان و ڕێزگرتن لەو متمانەیەی خەڵک بە دامەزراوەی یاسادانانی بەخشیووە.

زانیاریی زیاتر: سەرۆکایەتیی پەرلەمان دەشڵێت، بوونی نیساب بۆ دانیشتنی پەرلەمان کۆڵەکەی ئەرکە دەستوورییەکانە بەتایبەتیش پەسەندکردنی ئەو یاسا و بڕیارانەی توێژێکی گەورەی گەلی عێراق چاوەڕێی پەسەندکردنیان دەکەن، بۆیە گرنگە هەموو پەرلەمانتاران بەرپرسیاریەتی خۆیان جێبەجێ بکەن.