عێراق 14 فڕۆکەی مەدەنی دەکڕێت

ئاڤا نیوز

وەزارەتی گواستنەوەی عێراق پلانی خۆی بۆ کڕینی 14 فڕۆکەی نوێی "بۆینگ" و "ئەیرباس" ئاشکرا کرد. بەو پێیەش تاوەکوو کۆتایی ساڵی 2027 فڕۆکەکانی وەزارەتەکە دەگاتە 53 فڕۆکە.

 

بۆچی گرنگە: زیادکردنی ژمارەی فڕۆکەکان و هەوڵدان بۆ هەڵگرتنی سزاکان، هەنگاوێکی ستراتیژییە بۆ بوژاندنەوەی کەرتی گواستنەوەی ئاسمانیی عێراق و بەهێزکردنی پێگەی لەسەر ئاستی نێودەوڵەتی.

 

ڕاگەیێنراوی فەرمی: وەزارەتی گواستنەوەی عێراق ڕایگەیاند، وەزارەت 39 فڕۆکەی هەیە، شەشیان بە بەردەوامی کار دەکەن و 16ی دیکە نۆژەنکراونەتەوە ئەمە جگە لە 17 فڕۆکەی نوێ کە بەپێی گرێبەستی لەگەڵ کۆمپانیا ئەوروپی و ئەمریکییەکان وەرگیراون.

 

زانیاریی زیاتر: وەزارەتەکە دووپاتی کردەوە، سزای یەکێتیی ئەوروپا بۆ سەر هێڵی ئاسمانیی عێراق نزیکە کۆتایی پێبێت، دوای ئەوەی وەزارەتەکە بە هەماهەنگی لەگەڵ دەسەڵاتی فڕۆکەوانی مەدەنی، بەشێکی زۆری ڕێککەوتنە پێویستەکانی تەواو کرد و پابەند بوو بە جێبەجێکردنی پێوەرەکانی ڕێکخراوی فڕۆکەوانی مەدەنی نێودەوڵەتی (ICAO).