خاوەنی ئارایشتگایەكی خانمان لە ئیسپانیا بە تۆمەتی ناردنی پارە بۆ حەماس دەستگیر دەكرێت

ئاڤا نیوز

پۆلیسی ئیسپانیا هاوڵاتییەکی چینی تەمەن 38 ساڵیان دەستگیر کرد کە خاوەنی ئارایشتگایەكی خانمانە لە نزیک شاری بارسێلۆنا و تۆمەتبارە بە ناردنی بڕی 600 هەزار یۆرۆ (نزیکەی 715 هەزار دۆلار) لە ڕێگەی دراوی دیجیتاڵییەوە بۆ بزووتنەوەی حەماس.

زانیاریی بەدەستهاتوو: ماڵپەڕی ڕۆیتەرز بڵاوی كردەوە، بەپێی لێکۆڵینەوەکان، گومانلێکراوەکە لانیکەم 31 جار پارەی لە ڕێگەی جزدانە ئەلیکترۆنییەوە گواستووەتەوە بۆ چەند لایەنێک کە پەیوەندییان بە قەوارەیەکی سەر بە حەماسەوە هەبووە.

ئەوەی لەبارەیەوە دەگوترێت: پۆلیس بە ماڵپەڕەكەی ڕایگەیاندووە: چەندین هەژماری بانکیی دیکەیان بلۆک کردووە، کە کۆی گشتی بەهای داراییە دەستبەسەرداگیراوەکان و هەژمارە بەستووەکان دەگاتە زیاتر لە 370 هەزار یۆرۆ.

ئەمەش بزانە: ئەم لێکۆڵینەوەیە لە مانگی حوزەیرانی ڕابردووەوە، لە کاتی لێکۆڵینەوەیەکدا سەبارەت بە ساختەکاری و سپیکردنەوەی پارە دەستی پێکردووە. 

- ئەم ڕووداوە لە کاتێکدایە کە هۆشداری دەدرێت لەوەی گروپە چەکدارەکان بۆ گواستنەوەی پارە دراوە دیجیتاڵییەکان بەکاردەهێنن، ئەمەش پرۆسەی چاودێریکردن و پەکخستنی دارایی تێرۆر ئاڵۆزتر دەکات.