چۆڵکردنی گوندە عەرەبییەکان؛ مەترسییەکی شاراوە بۆ سەر ڕۆژئاوای کوردستان

ئاڤا نیوز

ڕۆکان جاف، نێردراوی ئاڤا میدیا دوای گەشتێکی مەیدانی یەک هەفتەیی بۆ ڕۆژئاوای کوردستان، زانیاری هەستیار دەربارەی دۆخی ئەمنی و سەربازی ناوچەکە ئاشکرا دەکات.

بۆچی گرنگە: ڕۆکان جاف لە گوندە عەرەبنشینەکانی دەوروبەری حەسەکە تێبینی دوو شتی کردووە؛ یەکەم چۆڵکردنی گوندەکان: هۆزە عەرەبەکان ژن، منداڵ و بەساڵاچووەکانیان بۆ شوێنێکی نادیار گواستووەتەوە و تەنیا گەنجان ماونەتەوە؛ ئەوان چاوەڕێی هەر دەرفەتێکن [وەک هەڵوەشانەوەی ڕێککەوتنەکەی نێوان هەسەدە و دیمەشق] بۆ ئەوەی پێش سوپای سووریا هێرش بکەنە سەر سەنگەرەکانی هەسەدە.

مەترسییەکان؛ ئەم گوندانە ڕاستەوخۆ لەسەر هێڵی پێشەوەی سەنگەرەکانی هەسەدەن، ئەمەش ئەگەری پێکدادان لەکاتی تێچوونی دۆخەکە و هەڵوەشاندنەوەی ڕێککەوتنەکە زیاتر دەکات.

ئەوەی پێویستە بیزانیت: لە بەرەی هەسەدەوە چ دەگوزەرێت؟ سەرەڕای گەیشتنە ڕێککەوتن لەگەڵ حکومەتی سووریا، هێزەکانی سووریای دیموکرات (هەسەدە) متمانەیان بە دۆخەکە نییە و بەردەوام سەنگەرەکانیان تووند دەکەن.

لەلایەکی دیکە: بەگوتەی ڕۆکان جاف، سەرەڕای ڕێککەوتنی نێوان هەسەدە و دیمەشق ئاوارەکان ئامادە نین بگەڕێنەوە ژێر دەسەڵاتی حکومەتی کاتی یان سوپا. ئەوان ترسیان هەیە لە دووبارەبوونەوەی سیناریۆکانی ڕابردوو و نەبوونی هیچ گەرەنتییەکی نێودەوڵەتی بۆ پاراستنیان.

باکگراوند؛ ڕۆژی هەینی ناوەندی ڕاگەیاندنی هەسەدە ئاشکرای کرد بۆ ڕاگرتنی تەواوەتیی شەڕ و دەستپێکردنی پڕۆسەی ئاشتیی، لەگەڵ حکومەتی سووریا گەیشتینە ڕێککەوتنێکی گشتگیر کە تێیدا هەموو دامەزراوە سەربازیی و کارگێڕییەکان یەکدەخرێنەوە.

 - بەپێی بڕگەکانی ڕێککەوتنەکە، سوپای سووریا لەو ناوچانەی حەسەکە و کۆبانی کە پێشتر وەک ناوچەی سەربازیی ناسرابوون دەکشێتەوە، لە بەرامبەریشدا یەکەکانی هێزی ئاسایشی ناوخۆی سەر بە وەزارەتی ناوخۆی سووریا دەچنە ناو سەنتەری شارەکانی حەسەکە و قامیشلۆ.

- لە ڕووی سەربازییەوە، فیرقەیەکی نوێ لە سێ لیوای شەڕڤانانی هەسەدە پێکدەهێنرێت و لیوایەکی تایبەتیش بۆ کۆبانی لەناو فیرقەیەکی پارێزگای حەلەبدا جێگیر دەکرێت.

- لە ڕووی کارگێڕییەوە، تەواوی دامەزراوەکانی ئیدارەی خۆسەر تێکەڵی فەرمانگەکانی حکومەت دەبن و فەرمانبەرانی مەدەنیی لە میلاکاتی فەرمیی سووریادا جێگیر دەکرێن. ڕێککەوتنەکە جەخت لە چارەسەرکردنی مافە مەدەنیی و پەروەردەییەکانی کورد و دابینکردنی زەمینەی گەڕانەوەی ئارەزوومەندانەی ئاوارەکان دەکاتەوە تاوەکو سەروەریی دەوڵەت بەسەر تەواوی خاکەکەدا بچەسپێت.