%99ی کارەکانی جووتسایدی کەلار-دەربەندیخان تەواو بووە

ئاڤا نیوز

بەشێکی دیکە لە ڕێگای نێوان کەلار-دەربەندیخان تەواو بووە، بریکاری وەزارەتی ئاوەدانکردنەوە و نیشتەجێبوونی حکومەتی هەرێمی کوردستان لەوبارەیەوە دەڵێت "99%ی کارەکان تەواوبوون".

وێنە گەورەکە: لە کابینەی نۆی حکومەتی هەرێمی کوردستان بە ڕژدی کار لەسەر پڕۆژەکانی ڕێگاوبان کراوە، ئەو پڕۆژانەش کە کارکردن تێیاندا وەستابوو خرانەوە کار، بەتایبەت ڕێگای نێوان شارەکان، لەنێویاندا ڕێگای کەلار-دەربەندیخان، هەولێر-کۆیە.

لێدوانی فەرمی: ئاگرین عەبدوڵڵا، بریکاری وەزارەتی ئاوەدانکردنەوە و نیشتەجێبوونی حکومەتی هەرێمی کوردستان، بە ئاڤا میدیای ڕاگەیاند: کارکردن لە ڕێگای کەلار-دەربەندیخان بەردەوامە، بەڵام 99%ی کارەکانیشی تەواو بووە و بە ڕووی شۆفێراندا کراوەتەوە.

- تێچووی جووتسایدی کەلار-دەربەندیخان 136 ملیار دینارە.

لەبارەی دروستکردنی تونێلی دەربەندیخان، ئاگرین عەبدوڵڵا وتی: تاوەکو ئێستا دەست بە کارکردن لە تونێلەکەدا نەکراوە.

لەلایەکی دیکەوە: سەبارەت بە کارکردن لە جووتسایدی هەولێر-کۆیە، بریکاری وەزارەتی ئاوەدانکردنەوە و نیشتەجێبوون ئاماژەی بەوە کرد، کارکردن لە ڕێگاکەدا بەردەوامە و 6%ی کارەکانیشی تەواو بووە، تێچووی پڕۆژەکەش 560 ملیار دینارە.