حکومەتی عێراق هەواڵی قرتاندنی 62 ترلیۆن دینار لەلایەن مشک و جرجەوە ڕەتدەکاتەوە

ئاڤا نیوز

کاردانەوەکانی قرتاندنی 62 ترلیۆن دینار لە لایەن مشک و جرجەوە لە عێراق تاوەکو دێت زیاتر دەبێت و حکومەتی عێراقیش ڕەتیدەکاتەوە، جرج و مشک گەیشتبنە قاسەی بانکی ناوەندی و پارەیان قرتاندبێت یان تێکیاندابێت.

چیرۆکی سەرەکی: ماوەی چەند رۆژێکە لە میدیا و سۆشیال میدیاکانی عێراق هەواڵی دیارنەمانی 62 ترلیۆن دینار بڵاوبووەتەوە و دەگوترێت، جرج و مشک قرتاندوویانە و تێکچووە.

لێدوانی فەرمی: مەزهەر محەممەد ساڵح، راوێژکاری دارایی سەرۆکوەزیرانی عێراق لەسەر ئەو بابەتە هاتە دەنگ و دەڵێت؛ "ئەم هەواڵەی بڵاوکراوەتە دەربارەی قرتاندنی 62 ترلیۆن دینار، زۆر نالۆژیکی و بێ بنەمایە و دوورە لە ڕاستی، چونکە لە ڕووی سیستەمی بانکی و ئابووری ئەستەمە شتی لەم شێوەیە ڕووبدات."

زانیاریی زیاتر: بە گوتەی ساڵح، کۆی دراوی عێراق بە دراوی یەدەگیشەوە 100 ترلیۆن دینار تێپەڕ ناکات و نزیکەی 88%ـی کۆی دراوی کاشیش، لە دەرەوەی سیستەمی بانکییە و بەدەستی هاووڵاتییانەوەیە.