پەرلەمانی عێراق چەندین یاسای گرنگ دەخاتە دەنگدان

ئاڤا نیوز

پەرلەمانی عێراق بۆ دانیشتنی ڕۆژی سێشەممە چەندین یاسای گرنگ دەخاتە دەنگدانەوە و هاوکات خوێندنەوە و گفتوگۆ بۆ چەند پرۆژەیاسایەکی دیکە دەکات.

ڕاگەیێنراوی فەرمی: بەگوێرەی ڕاگەیێنراوی نووسینگەی ڕاگەیاندنی پەرلەمانی عێراق بڕیارە کاتژمێر 1ـی دوای نیوەڕۆی ڕۆژی سێشەممە، 5ـی ئابی 2025، پەرلەمانی عێراق دانیشتنی ژمارە 4ـی خۆی ئەنجام بدات و دەنگ لەسەر چەندین پڕۆژەیاسای گرنگ بدات.

بەگوێرەی کارنامەی دانیشتنەکە، پەرلەمانی عێراق دەنگ لەسەر پێنج پڕۆژەیاسای گرنگ دەدات، کە بریتین لە:

یەکەم: هەموارکردنی یاسای یەکسانکردنی بڕوانامە زانستییەکانی عەرەبی و بیانی.

دووەم: پەسەندکردنی ڕێککەوتنی هاندان و پاراستنی وەبەرهێنان لەگەڵ شانشینی عەرەبستانی سعودیە.

سێیەم: پڕۆژەیاسای ڕێکخستنی وزە نوێبووەوەکان.

چوارەم: هەموارکردنی یاسای دەستەی نیشتمانی بۆ چاودێریی ئەتۆمی، تیشکی، کیمیایی و بایۆلۆجی.

پێنجەم: پڕۆژەیاسای تەندروستیی دەروونی.

لەلایەکی دیکەوە: پەرلەمان خوێندنەوە و گفتوگۆی دووەم بۆ دوو پڕۆژەیاسای گرنگ دەکات، کە یەکەمیان تایبەتە بە دامەزراندنی کۆلێژی فڕۆکەوانیی سوپا و دووەمیشیان پڕۆژەیاسای ڕێکخستنی مافی پێکهاتەکان، کە لەلایەن لیژنەی مافی مرۆڤەوە ئامادەکراوە.

لەهەمان کاتدا: خوێندنەوەی یەکەم بۆ سێ پڕۆژەیاسای دیکە دەکرێت، کە بریتین لە هەموارکردنی یاسای دیوانی وەقفی سوننی، یاسای چاودێریی نەوجەوانان و یاسای چاودێریی منداڵانی خوار تەمەنی یاسایی.