به‌شی ڕاگه‌یاندن و بازاڕگه‌ری لە کۆلێژی تەکنیکی سۆران دەکرێتەوە

ئاڤا نیوز

به‌شی ڕاگه‌یاندن و بازاڕگه‌ری لە کۆلێژی تەکنیکی سۆران کرایەوە و بۆ ساڵی خوێندنی 2025-2026 دەرچووانی پۆلی 12ی ئامادەیی دەتوانن پیشکەشی ئەو بەشە بکەن.

وێنە گەورەکە: کۆلێژی تەکنیکی سۆران سەر بە زانکۆی پۆلیتەکنیکی هەولێرە، ساڵی 2001 دامەزراوە و شەش بەشی هەیە و ساڵانە زیاتر لە هەزار و 200 قوتابی لەو کۆلێژە دەخوێنن.

لێدوانی فەرمی: پرۆفیسۆری یاریدەدەر، د. سیروان لەتیف حاجی، ڕاگری کۆلێژی تەکنیکی سۆران بە ئاڤای گوت: به‌شی ڕاگه‌یاندن و بازاڕگه‌ریمان کردووەتەوە و بۆ ئەمساڵی خوێندن دەرچووانی پۆلی 12ی ئامادەیی دەتوانن پێشکەشی ئەو بەشە نوێیە بکەن.

- چوار هۆڵی نوێمان کردووەتەوە و مامۆستا و پێداویستی خوێندنمان ئامادەکردووە، بۆ ئەم بەشە پلانی وەرگرتنی 90 قوتابیمان هەیە، 45 بۆ بەیانیان و 45 بۆ ئێواران.

- بۆ ساڵی خوێندنی 2025-2026، ده‌رچووانی پۆلی 12ی ئاماده‌یی له‌ڕێگەی زانكۆلاین ده‌توانن داواكاری بۆ خوێندن له‌و به‌شه‌ پێشكه‌ش بكه‌ن و ده‌رچووانیشی ده‌بنه‌ هه‌ڵگری بڕوانامه‌ی دیبلۆمی دوو ساڵه‌.

زانیاریی زیاتر: کۆلێژی تەکنیکی سۆران ئەم بەشانە لەخۆدەگرێت، "کارگێڕی کار، ژمێریاری، تەکنەلۆجیای زانیاری، پەرستاری، ئافرەتان و لەدایکبوون، شیکاری نەخۆشییەکان" بۆ ئەمساڵیش بەشی ڕاگه‌یاندن و بازاڕگه‌ری لە کۆلێژەکە دەکرێتەوە.