بەرگریی شارستانی: ڕووبەرە ئاوییەکانی هەرێمی کوردستان بۆ مەلەوانی شیاو نین و مەترسیدارن

ئاڤا نیوز 

 

بەرگریی شارستانیی هەرێمی کوردستان هاونیشتمانیان ئاگادار دەکاتەوە زێ، ڕووبار، گۆم و بەنداوەکانی هەرێمی کوردستان بۆ مەلەوانی شیاو نین و مەترسیدارن و دەڵێت، 

 

چیرۆکی سەرەکی: لە سەرەتای ئەمسالەوە 43 کەس لە هەرێمی کوردستان لە ئاودا خنکاون، تەمەنی زۆربەیان لە نێوان 15 بۆ 25 ساڵیەوە بووە.

 

لێدوانی فەرمی: سەرکەوت کاڕەش، وتەبێژی بەرگریی شارستانیی هەرێمی کوردستان بە ئاڤای گوت: زێ، ڕووبار، گۆم و بەنداوەکانی هەرێمی کوردستان بۆ مەلەوانی شیاو نین و مەترسیدارن، بەهۆی قوڵی و تیژڕەوی و ساردی ئاوەکانیان، مەلەوانی کردن لەو ڕووبەرە ئاوییانە مەترسیدارە.

 

سەرکەوت کارەش دووپاتی دەکاتەوە: لە زۆربەی ئەو شوێنانەی خەڵک بۆ مەلەوانی ڕووی تێدەکەن، بەهەرسێ زمانی کوردی، عەرەبی و ئینگلیزی تابلۆی ئاگاداریمان داناوە، بەڵام بەداخەوە هاونیشتمانیان پابەند نابن، لە هەندێ شوێنیش تابلۆکان لابراون یان شکێنراون.

 

زانیاری زیاتر: لە پێنج شەممەی ڕابردووەوە حەوت کەس خنکاون، یەکێکیان لە زێی گەورە لە سنووری قەزای خەبات، چوار کەسیان لە ڕووباری خازر لە سنووری قەزای بەردەڕەش و دوو کەسیشیان لە پۆندی پریس لە هەڵەبجە.

 

ژمارەکان وادەڵین: ئاماری خنکان لە ناوچەکانی هەرێمی کوردستان لە ساڵی 2025 بەمشێوەیەن. 

هەولێر: 14 کەس. 
سلێمانی: دوو کەس.
دهۆک: شەش کەس.
هەڵەبجە: دوو کەس.
ئەوەی دیکە بەسەر ئیدارە سەربەخۆ و قەزاکاندا دابەش دەبن.