سەرۆککۆماری عێراق داوای ڕاگرتنی دامەزراندن و گرێبەست دەکات

ئاڤا نیوز

سەرۆککۆماری عێراق چەند پێشنیازێک دەداتە هاوپەیمانیی چوارچێوەی هەماهەنگیی حوکمڕان سەبارەت بە پاکی و بێگەردیی هەڵبژاردن، تێیدا داواشی کردووە دامەزراندن و گرێبەست و دابەشکردنی زەوی تاوەکو دوای هەڵبژاردن ڕابگیرێت.

وێنە گەورەکە: د. لەتیف ڕەشید، سەرۆککۆماری عێراق لە نووسراوێکدا بە ناونیشانی "ڕێکارەکانی دەستەبەرکردنی بێگەردیی هەڵبژاردن" بە ڕێککەوتن لەگەڵ محەممەد شیاع سوودانی، سەرۆکوەزیرانی عێراق هەشت پێشنیازی خستووەتە ڕوو لەپێناو "دەستەبەرکردنی ژینگەیەکی هەڵبژاردنی سەلامەت و سەقامگیر کە ناونیشانەکەی شەفافییەت و پاکی دڵنیاکردنەوەی ڕێکخراوە نێودەوڵەتی و کۆمەڵایەتییەکان و کۆمەڵگەی نێودەوڵەتی بێت بەگشتی."

ڕاگەیێنراوی فەرمی: نووسینگەی سەرۆکایەتی کۆمار ڕایگەیاند، پێشنیازەکانی سەرۆککۆمار بریتین لە "ڕاگرتنی دامەزراندن و گرێبەستەکانی حکومەت، ڕاگرتنی بیمەی نوێی کۆمەڵایەتی، ڕاگرتنی دابەشکردنی پارچە زەوی، ڕاگرتنی گواستنەوەی ئەندامانی سوپا و هێزە ئەمنییەکان، هەروەها ڕاگرتنی دەرکردنی سوپاسنامەی بەکۆمەڵ بۆ فەرمانبەران لەلایەن سەرۆکوەزیران و حکومەتە خۆجێییەکانەوە تا تەواوبوونی هەڵبژاردنەکان".

لەتیف ڕەشید پشینیازیشی کردووە، ئەو کاندیدانەی فەرمانبەرن مۆڵەتی بە مووچە یان بێ مووچە وەرگرن تاوەکو دوای هەڵبژاردن بۆ ئەوەی پێگە و پیشەی خۆیان لە بانگەشەکردن بەکارنەهێنێن.

هاوکات داوای دانانی مەرج و ڕێکاری پێویستی کرد بۆ ڕێگریکردن لە بەکارهێنانی هەموو جۆرەکانی سەرچاوە مرۆیی و ماددییەکانی دەوڵەت بۆ مەبەستی بانگەشەی هەڵبژاردن، هەروەها دانانی میکانیزمێک بۆ هەموو بەڕێوەبەرەکان و بەرپرسی فەرمانگەکان و فەرمانبەرە باڵاکان لە بەکارهێنانی هەژموونیان بۆ بانگەشە بۆ لیست و کاندیدەکان.