کەمی ئۆکسجین و نەبوونی هەواگۆڕکێ دووکاندارانی بازاڕێکی هەولێری بێزار کردووە

ئاڤا نیوز

دووکاندارانی نهۆمی ژێرزەمینی بازاڕی مۆدێرنی داون تاون لە شاری هەولێر، بەهۆی کەمیی ئۆکسجین و نەبوونی هیچ دەرچەیەک بۆ هەواگۆڕکێ، ئۆقرەیان لێ بڕاوە و داوای چارەسەرێکی خێرا و بنەڕەتی بۆ کێشەکەیان دەکەن.

زانیاریی پەیامنێر: پەیامنێری ئاڤا نیوز، هیشام سەعید، سەردانی ژێرزەمینی بازاڕەکەی کردووە و لە نزیکەوە گوێی لە سکاڵای دوکانداران گرتووە. محەمەد سەردار، یەکێک لە دوکاندارەکان، ڕاگەیاند: "جەوی بازاڕەکە زۆر گەرمە و هیچ هەوایەک لە هیچ شوێن و دەرچەیەکەوە نایەتە ژوورەوە. دۆخمان زۆر خراپە و خەریکە دەخنکێین. ئەم دۆخە و کەمیی ئۆکسجین بووەتە هۆی تووشبوونمان بە چەندین نەخۆشی."

دوکاندارێکی دیکە بەناوی محەممەد سابیر، بە گاڵتەجاڕییەوە باس لە سەختیی دۆخەکە دەکات و دەڵێت: "ئەم شوێنە وەک هۆڵی وەرزشی لێهاتووە، هەر کەسێک بیەوێت کێشی دابەزێنێت با بێتە ئێرە، بە چەند سەعاتێک چەند کیلۆیەک کەم دەکات."

بۆچوونی لایەنی بەرامبەر: دوای بەدواداچوونی ئاڤا نیوز، مەحموود نەشئەت، بەڕێوەبەری کارگێڕیی پڕۆژەی داون تاون بەڵێنی دا کێشەکە چارەسەر بکەن. ئەو ئاماژەی بۆ ئەوەش کرد کە "بەشێک لە دووکانداران پابەندی پێدانی کرێی دوکانەکانیان نین لەکاتی خۆیدا،"

بەرێوەبەری کارگێڕی پرۆژەکە گوتیشی، "دوای ئەوەی ئێوە وەک ئاڤا هاتنە سەر هێڵ، بەڵێن دەدەین لە نزیکترین کاتدا چارەسەری کێشەی هەواگۆڕکێیان بۆ بکەین."