مەشهەدانی لۆمەی مەندەلاوی دەکات و نایاساییبوونی دانیشتنەکەی سێشەممە ڕادەگەیێنێت

ئاڤا نیوز

سەرۆکی ئەنجوومەنی نوێنەرانی عێراق دانیشتنی ئەمڕۆی پەرلەمان بە "نادروست" ناودەبات، هۆکارەکەشی بۆ ئەوە دەگەڕێنێتەوە کە "بەبێ سەرۆکایەتیی ئەو" بەڕێوەچووە.

 

چیرۆکی سەرەکی: کۆبوونەوەکەی ئەمڕۆی پەرلەمانی عێراق بەهۆی زیادکردنی بڕگەی دەنگدان لەسەر سەرۆکی ئەنجوومەنی دەوڵەت و ئەندامانی ئەنجوومەنی خزمەت لەلایەن شیعەکانەوە، گرژی تێکەوت و دوو پەرلەمانتاری شیعە و سوننە کردیان بە شەڕی دەستەویەخە، بەهۆی شکانی نیسابی دانیشتنیش دانیشتنەکە و بڕگە پەسەندکراوەکانی "هەڵوەشێنرایەوە".

 

نووسراوی فەرمی: بەگوێرەی نووسراوێکی فەرمی کە ئاراستەی جێگرەکانی و سەرجەم ئەندامان و فراکسیۆنەکانی پەرلەمان کراوە، مەشهەدانی جەختی کردووەتەوە کە بەڕێوەچوونی دانیشتنەکە "پێشێلکارییەکی ڕوونی پەیڕەوی ناوخۆی پەرلەمانە." لە نووسراوەکەدا هاتووە: "هەر بڕیار و ڕێکارێک لەو دانیشتنەدا دەرچووبێت، بە پووچەڵ (باطل) دادەنرێت و هیچ لێکەوتەیەکی یاسایی نابێت."

 

ئەوەی پێویستە بیزانیت: سەرۆکی پەرلەمان پشتی بە ماددە (34/دووەم)ی پەیڕەوی ناوخۆی ئەنجوومەنی نوێنەران بەستووە، کە تێیدا هاتووە سەرۆکایەتیکردنی دانیشتنەکان تایبەتە بە سەرۆکی پەرلەمان و تەنیا لە حاڵەتی ئامادەنەبوونی ئەودا، دەسەڵاتەکە بۆ جێگرەکانی دەگوازرێتەوە. مەشهەدانی ئاماژەی بەوە کردووە کە سەرەڕای ئامادەبوونی لە پەرلەمان، دانیشتنەکە بەبێ ڕەزامەندی و ئاگاداریی ئەو بەڕێوەچووە.