حیزبوڵڵا بڕیاری حکومەت بۆ چەککردنیان ڕەت دەکاتەوە

ئاڤا نیوز

حیزبوڵڵای لوبنانی بە تووندی دژی بڕیارێکی حکومەتی نوێی لوبنان بە سەرۆکایەتیی نەواف سەلام، دەوەستێتەوە کە تایبەتە بە دانانی پلانێک بۆ کۆکردنەوەی چەکی مقاوەمە لە دەرەوەی دەسەڵاتی دەوڵەت.

 

چیرۆکی سەرەکی: ڕۆژی سێشەممە 5ـی ئاب، نەواف سەلام، سەرۆکوەزیرانی لوبنان ڕایگەیاند، سوپای وڵاتەکەیان ڕاسپاردووە بۆ ئامادەکردنی پلانێک بەمەبەستی سنووردارکردنی چەک تەنیا لە دەستی لایەنە پەیوەندیدارەکانی دەوڵەت.

 

ڕاگەیێنراوی فەرمی: بەگوێرەی ڕاگەیێنراوێک، حیزبوڵڵا ئەم هەنگاوەی بە "گوناهێکی گەورە" و پێشێلکارییەکی ئاشکرای دەستوور و بەیانی وەزاری خودی حکومەت ناوبرد، کە بە وتەی ئەوان، لوبنان لەبەردەم "دوژمنی ئیسرائیلی"دا لاواز و بێبەرگری دەکات.

 

لەهەمان کاتدا: حیزبوڵڵا جەختی لەوە کردەوە کە بڕیارەکە لە ژێر "فشار و دیکتاتۆرییەی نێردەی ئەمریکی" دەرچووە و ڕاستەوخۆ خزمەت بە بەرژەوەندییەکانی ئیسرائیل دەکات.

 

لەلایەکی دیکەوە: ئاماژە بەوە دەدات کە حکومەت بەڵێنەکەی سەرۆککۆمار، جۆزێف عەونی پشتگوێ خستووە، کە لە وتاری سوێندخواردنیدا باسی لە گفتوگۆکردنی "ستراتیژییەکی بەرگریی گشتگیر" کردبوو، نەک چەککردنی تاکلایەنە لە کاتی بەردەوامیی هێرشەکاندا. بە بڕوای حیزبوڵڵا، ئەمە ستراتیژیی "خۆبەدەستەوەدانە"، نەک بەرگری.