فشارەکان بۆ چەک داماڵینی حیزبوڵڵا زیاتر دەبن؛ حیزبوڵڵاش هەڕەشە دەکات

ئاڤا نیوز

لەژێر فشاری ئەمریکا و لە ترسی فراوانبوونی هێرشە بەردەوامەکانی ئیسرائیل بۆ سەر لوبنان، حکومەتی لوبنان بۆ درێژەدان بە گفتوگۆکانی تایبەت بە پرسی چەک داماڵینی حیزبوڵڵا،  کۆبوونەوەیەکی نوێی ئەنجام دا.

چیرۆکی سەرەکی:  حکومەتی لوبنان سوپای وڵاتەکەی ڕاسپاردووە تا کۆتایی ئەمساڵ پلانێک بۆ چەک داماڵینی حزبوڵڵا  ئامادە بکات، لە کاتێکدا فشارێکی زۆری ئەمریکای لەسەرە و حزبوڵڵاش بە تەواوەتی ئەو هەنگاوە ڕەتدەکاتەوە.

زانیاریی بەدەستهاتوو: بەپێی میدیاکانی لوبنان، کۆبوونەوەکەی ئەمڕۆی پێنجشەممە 7-8-202، کە لە کۆشکی کۆماری بەڕێوەچوو، بۆ تاوتوێکردنی ناوەڕۆکی یاداشتێکی تۆم باراک، نێردەی ئەمریکا بۆ چەک داماڵینی حیزبوڵڵا تەرخان کرابوو.

لەلایەکی دیکەوە: فراکسیۆنی حیزبوڵڵا لەپەرلەمانی لوبنان، داوای لە حکومەت کردووە ملکەچی داواکارییەکانی ئەمریکا نەبێت، چونکە لە بەرژەوەندیی ئیسرائیلە.

ئەوەی پێویستە بیزانیت: لەژێر فشاری ئەمریکا و لە ترسی فراوانبوونی هێرشە بەردەوامەکانی ئیسرائیل بۆ سەر لوبنان، نەواف سەلام، سەرۆکوەزیرانی لوبنان، ڕۆژی سێشەممەی ڕابردوو 5-8-2025، سوپای لوبنانی ڕاسپارد پلانێک بۆ چەک داماڵینی حیزبوڵڵا تا کۆتایی ئەمساڵ  داڕیژێت،  پلانەکەش پێش 31-8-2025 بۆ گفتوگۆکردن و پەسەندکردنی دەبێت پێشکەشی ئەنجوومەنی وەزیران بکرێت.

گۆشه‌یه‌كی دیكه‌ی دیمه‌نه‌كه: ڕۆژنامەی "ئەخبار"ی نزیک لە حیزبوڵڵا، ئەمڕۆ پێنجشەممە لە زاری سەرچاوەیەکی سیاسیی ئاگادارەوە، بڵاوی کردەوە، حیزبوڵڵا و هاوپەیمانەکەی بزووتنەوەی ئەمەل، کۆمەڵێک کارتی سیاسییان بەدەستەوەیە وەک کشانەوە لە حکومەت و سەندنەوەی متمانە لێی لەناو پەرلەماندا،  ئەگەر حکومەت لە بڕیارەکەی پاشگەز نەبێتەوە.