ئۆپەراسیۆنی "سەپاندنی یاسا" دەگاتە عوزێر

ئاڤا نیوز

لەبەرەبەیانی ئەمڕۆ هەینی 8-8-2025ـەوە، ئۆپەراسیۆنی "سەپاندنی یاسا" لە ناحیەی عوزێری سەر بە پارێزگای میسان دەستیپێکردووە و یەکەکانی سوپای عێراق و هێزەکانی  وەزارەتی ناوخۆ بە فراوانی بڵاوەیان پێکراوە.

چیرۆکی سەرەکی: دوای زیادبوونی ڕووداوەکانی ناکۆکیی خێڵەکی، ماوەی چەند ڕۆژێکە هێزێکی سەربازی لە بەغداوە گەیشتە پارێزگای میسان و لەچەند ناوچەیەکی ئەو پارێزگایە بڵاوەی پێکرا و چەند ئۆپەراسیۆنێکی بۆ جێبەجێکردنی یاسا و کۆنترۆڵکردنی ئاسایشی شاری عیمارە و دەورووبەری ئەنجام دا.

لێدوانی فەرمی: سەرچاوەیەکی ئەمنی ڕایگەیاند، وەک بەشێک لە ستراتیژیی سەپاندنی یاسا لە ناحیەی عوزێر، کە بە یەکێک لە ناحیە گرنگەکانی میسان دادەنرێت، هێزێکی ئەمنی هاوبەش، بە پاڵپشتیی کاروانەکانی سوپای عێراق، لە چەندین میحوەرەوە دەستیان بە جێبەجێکردنی ئۆپەراسیۆنێکی بەرفراوانی گەڕان و پشکنین کردووە، ئامانج لە ئۆپەراسیۆنەکە شوێنکەوتنی داواکراوان و کۆتاییهێنان بە دۆسیەی ناکۆکییە خێڵەکیەکانە.

زانیاریی زیاتر: ئەو سەرچاوەیە ئاماژەی بەوەشکرد، ئەم ئۆپەراسیۆنە لە چوارچێوەی پلانی سەپاندنی یاسادایە لەسەر ئاستی پارێزگای میسان، کە 72 کاتژمێر پێش ئێستا بە فەرمانی ڕاستەوخۆی سەرۆکوەزیران دەستیپێکردووە، ئەمەش لەسەر بنەمای ڕووداوەکانی کوشتنی ئەم دواییە کە بەهۆی دوژمنایەتی و کێشەی خێڵەکییەوە و دووبارەبوونەوەی پێکدادانە چەکدارییەکانەوە ڕوویانداوە.