نێچیرڤان بارزانی دەستخۆشی لە ترەمپ دەكات

ئاڤا نیوز

سەرۆكی هەرێمی كوردستان، پێشوازی لە واژۆكردنی ڕێككەوتنی ئاشتیی نێوان ئازەربایجان و ئەرمەنستان دەكات و دەستخۆشیش لە دۆناڵد ترەمپ دەكات بۆ سەرخستنی ڕێككەوتنەكە.

چیرۆكی سەرەكی: دوای زیاتر لە سێ دەیە لە ململانێ؛ ئەرمینیا و ئازەربایجان ڕۆژی هەینی 8-8-2025، بە نێوەندگیری ترەمپ، ڕێککەوتنی ئاشتییان لە كۆشكی سپی واژۆ کرد و بڕیاریندا كۆتایی بە هەموو گرژی و ناكۆكییەكانی نێوانیان بهێنن.

پەیامی فەرمی: نێچیرڤان بارزانی، سەرۆكی هەرێمی كوردستان، لە ئەژماری فەرمیی خۆی لە تۆڕی كۆمەڵایەتی ئێكس نووسیویەتی: "پێشوازی لە واژۆكردنی ڕێككەوتنی ئاشتیی نێوان ئازەربایجان و ئەرمەنستان لە كۆشكی سپیدا دەكەم، دەستخۆشی لە سەرۆك دۆناڵد ترەمپ دەكەم بۆ سەرخستنی ئەم ڕێككەوتنە مێژووییە."

خاڵە ئەرێنییەكان: بەگوێرەی ڕێككەوتنەكە، ئەرمینیا و ئازەربایجان پابەند دەبن بە ڕاگرتنی هەمیشەیی هەموو شەڕ و ناكۆكییەکان، هاوكات دەروازەی بازرگانی، گەشت و پەیوەندییە دیپلۆماسییەکان بەڕووی یەكتردا دەكەنەوە و ڕێزگرتن لە سەروەری و یەکپارچەیی خاکی یەکتر دەگرن. ڕێککەوتنەکە ڕێڕەوێکی ترانزێت لەناو ئەرمینیا بۆ بەستنەوەی ئازەربایجان بە ناوچەی نەخچیڤانەوە لەخۆدەگرێت، و ئەمریکا مافی پەرەپێدانی ئەم ڕێڕەوەی دەبێت کە ناوی نراوە "ڕێگای ترەمپ بۆ ئاشتی و خۆشگوزەرانی نێودەوڵەتی" (TRIPP).