لە هەڵبژاردنی داهاتووی عێراقدا هەڵەبجە وەک پارێزگا مامەڵەی لەگەڵ ناکرێت

ئاڤا نیوز

سەرەڕای ئەوەی لەمساڵدا بە فەرمی بووە پارێزگا، هەڵەبجە لە هەڵبژاردنی داهاتووی پەرلەمانی عێراقدا وەک بازنەیەکی سەربەخۆی هەڵبژاردن مامەڵەی لەگەڵ ناکرێت و وەک قەزایەک لە چوارچێوەی پارێزگای سلێمانیدا دەمێنێتەوە.

چیرۆکی سەرەکی: ڕۆژی شەممە، 9ی ئابی 2025، کۆمیسیۆنی باڵای سەربەخۆی هەڵبژاردنەکانی عێراق لە میانەی تیروپشکێکدا بۆ دیاریکردنی ژمارەی لایەنە سیاسییەکان، پشتڕاستی کردەوە کە هەڵەبجە بازنەی تایبەت بە خۆی نابێت.

لێدوانی فەرمی: ڕێبوار ئەمین، بەرپرسی هەڵبژاردنەکانی پارتی دیموکراتی کوردستان لە پارێزگای هەڵەبجە، لە لێدوانێکدا بۆ ئاڤا میدیا ڕایگەیاند، "کۆمیسیۆن کار بە یاسای هەموارکراوی هەڵبژاردنەکانی ساڵی 2023ی پەرلەمانی عێراق دەکات."

هۆکارە زانراوەکان: هۆکاری سەرەکی ئەم بڕیارە دەگەڕێتەوە بۆ ئەوەی کە لە کاتی دەرچوواندن و پەسەندکردنی یاسای هەڵبژاردنەکاندا، هەڵەبجە هێشتا بە شێوەیەکی یاسایی وەک پارێزگایەکی سەربەخۆ لەلایەن حکومەتی فیدراڵییەوە دانپێدانەنرابوو.

ئەوەی پێویستە بیزانیت: بە وتەی ڕێبوار ئەمین، تاکە ڕێگە بۆ ئەوەی هەڵەبجە لە هەڵبژاردنەکانی داهاتوودا وەک پارێزگایەکی سەربەخۆ و خاوەن بازنەی تایبەت بە خۆی مامەڵەی لەگەڵ بکرێت، هەموارکردنەوەی دووبارەی یاسای هەڵبژاردنەکانی عێراقە لەلایەن پەرلەمانەوە.

ئەمەش بزانە: شایەنی باسە، لە هەڵبژاردنی ڕابردووی پەرلەمانی کوردستاندا، هەڵەبجە وەک بازنەیەکی سەربەخۆ مامەڵەی لەگەڵ کرابوو، کە نزیکەی 62 هەزار دەنگدەری هەبوو و خاوەنی سێ کورسی پەرلەمانی بوو.

 

باکگراوند: پەرلەمانی عێراق لە ڕێککەوتی 14ی نیسانی 2025، پڕۆژەیاسای بەپارێزگابوونی هەڵەبجەی پەسەند کرد دواتر لە 5ی ئایاری هەمان ساڵدا، دوای واژۆکردنی لەلایەن سەرۆککۆماری عێراقەوە، یاساکە لە ڕۆژنامەی وەقائیعی عێراقی بڵاوکرایەوە و بە فەرمی چووه‌ بواری جێبه‌جێكردنه‌وه‌.