وەزارەتی دەرەوەی ئێران: ئێران و عێراق ڕێککەوتنێکی ئەمنی واژۆ دەکەن

ئاڤا نیوز

وتەبێژی وەزارەتی دەرەوەی ئێران ئاشکرای کرد، لە میانەی سەردانەکەی لاریجانی بۆ عێراق ڕێککەوتنێکی ئەمنی لەگەڵ ئەو وڵاتە واژۆ دەکات.

چیرۆکی سەرەکی: عەلی لاریجانی، ئەمینداری نوێی ئەنجوومەنی باڵای ئاسایشی نیشتمانیی ئێران، گەیشتە بەغدای پایتەختی عێراق و لەگەڵ قاسم ئەعرەجی، ڕاوێژکاری ئاسایشی نیشتمانیی عێراق تاوتوێی پرسە ئەمنییە هاوبەشەکانی کرد و بڕیارە لەگەڵ سەرۆککۆمار، سەرۆکوەزیران، سەرۆکی پەرلەمان و بەشێک لە کەسایەتییە سیاسییەکان کۆببێتەوە.

لێدوانی فەرمی: ئیسماعیل بەقائی، وتەبێژی وەزارەتی دەرەوەی ئێران ڕایگەیاند: ئامانجی ئەم سەردانە تەواوکردنی لێکتێگەیشتنی ئەمنی نێوان هەردوو وڵاتە، دەقی بەڵگەنامەکە پێشتر یەکلایی بووەتەوە و لەم سەردانەدا لەلایەن بەرپرسانی هەردوو وڵاتەوە واژۆ دەکرێت.

زانیاریی زیاتر: بەگوێرەی میدیاکان، عەلی لاریجانی لە لێدوانێکدا سەبارەت بە ئامانجی سەردانەکەی بۆ عێراق، ڕایگەیاندبوو: ڕێککەوتنێکی گرنگی ئەمنی واژۆ دەکەین.