ئەردۆغان: دڵنیاین لە سەرکەوتنی پرۆسەی "تورکیایەکی بێ تیرۆر"

ئاڤا نیوز

 

ڕەجەب تەیب ئەردۆغان، سەرۆککۆماری تورکیا، لە دوای کۆبوونەوەی کابینەی سەرۆکایەتی حکومەتەکەی ڕایگەیاند، وڵاتەکەی بە دڵنیاییەوە ئامانجی "تورکیایەکی بێ تیرۆر" دەپێکێت و جەختیشی کردەوە کە ڕێگە نادەن ئیسرائیل ناوچەکە ڕاپێچی کارەساتی گەورەتر بکات.

چیرۆکی سەرەکی: ئەردۆغان لە وتارێکدا بۆ ڕای گشتی، تیشکی خستە سەر دوو تەوەری سەرەکی: هەوڵەکانی تورکیا دژی تیرۆر و هەڵوێستی وڵاتەکەی بەرامبەر بە دۆخی غەززە.

ئەوەی پێویستە بیزانیت: سەرۆککۆماری تورکیا ئاماژەی بەوەدا کە دەرفەتێکی مێژوویی بۆ وڵاتەکەی ڕەخساوە تا بۆ هەمیشە لە "تیرۆر ڕزگاری بێت" و وتی: "بە دڵنیاییەوە ئامانجی تورکیای بێ تیرۆر دەپێکین و دەریدەخەین کە فیداکاریی شەهید و قارەمانەکانمان بەفیڕۆ نەچووە."

ئەردۆغان ئومێدی خۆی بە کارەکانی "کۆمیسیۆنی هاوپشتی نەتەوەیی، دیموکراسی و برایەتی" نیشاندا و وتی: "دەرکردنی بڕیارەکان بە کۆدەنگی لە دوو کۆبوونەوەی یەکەمی کۆمیسیۆنەکەدا ئومێدبەخشە و هیوادارم ئەم ڕەوتە بەردەوام بێت. تورکیا لە بەرە جۆراوجۆرەکاندا دەستی بە خەباتێکی زۆر سەخت کردووە کە سەدەی داهاتوو دیزاین دەکەنەوە. ئێمە ئەمە بۆ بونیادنانی 'سەدەی تورکیا' ئەنجام دەدەین."

ناوبراو هۆشداریشیدا و وتی: "ئۆباڵی هەر خەسارەتێک لەم پرسە چارەنووسسازەدا قورس دەبێت."

 

لەلایەکی دیکە: تەوەری دووەمی قسەکانی ئەردۆغان تایبەت بوو بە دۆخی فەڵەستین، کە تێیدا بە توندی هێرشی کردە سەر ئیسرائیل و وتی: "تورکیا بە ئاشکرا دژی وەحشیگەری، دڕندەیی، ئەشکەنجە و ستەمی دەوڵەتی تیرۆریستی ئیسرائیل بەرامبەر فەڵەستینییەکان وەستاوەتەوە."

ئەردۆغان دووپاتیکردەوە، کە "بۆ بوون بە ئومێدێک بۆ غەززە، هەموو سەرچاوە و توانا دیپلۆماسییەکانی دەوڵەتەکەمان بەکار هێناوە."

ئەردۆغان لەبارەی بنیامین نەتەنیاهۆ، سەرۆکوەزیرانی ئیسرائیل قسەی کرد و گوتی، "ڕێگە نادەین نەتانیاهۆ و تۆڕە بکوژەکانی، بە مەبەستی درێژکردنەوەی ژیانی سیاسیی خۆیان، ناوچەکەمان ڕاپێچی کارەساتێکی گەورەتر بکەن."