چەند هەواڵێکی نوێ لە وەزارەتی خوێندنی باڵا لەبارەی خوێندن و دامەزراندن

ئاڤا نیوز

لەبارەی دامەزراندنی سێ یەکەمەکانی زانکۆ حکومییەکانی هەرێمی کوردستان، هەروەها لەبارەی دامەزراندنی وانەبێژەکانەوە، بەرپرسێکی وەزارەتی خوێندنی باڵا دەڵێت، "ژمارەی سێ یەکەمەکان 10 هەزار کەسە، هەروەها لەنێو ئەو مامۆستایانەی بە گرێبەست دامەزراون هەزار کەسیان شایستە نەبوون".

لێدوانی تایبەت: د.توانا نەجەف، بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵا و توێژینەوەی زانستی لە بەرنامەی مۆری ئاڤا ڕایگەیاند: بۆ سێ یەکەمەکانی ساڵی 2017-2018 تا 2024-2025، نووسراومان بۆ ئەنجوومەنی وەزیران کردووە، بە بڕیاری ئەنجوومەنی وەزیران ئێمە و وەزارەتی دارایی و ئابووری بۆ گفتوگۆ لەگەڵ حکومەتی فیدراڵ سەرپشک کراین، بۆ ئەوەی ئەو بڕە پارەیەی بۆ دامەزراندنی سێ یەکەمەکان و هەڵگرانی بڕوانامەی ماستەر و دکتۆرا پێویستە، بەغدا بیخاتە سەر ئەو بودجەیەی بۆمان دێت.

- ژمارەی سێ یەکەمە دانەمەزراوەکان 10 هەزار کەسە، تا ئێستا بڕیاری دامەزراندنیان دەرنەچووە.

- لە کابینەی نۆدا دوو ڕەوەندی سێ یەکەمەکان دامەزران، ژمارەیان دوو هەزار کەسە.

- چوار هەزار وانەبێژی وەزارەتی خوێندنی باڵا بە بڕیاری ئەنجوومەنی وەزیران فەرمانی دامەزراندنیان بۆ دەرچوو، بەڵام هەزار کەسیان شایستە نەبوون.

- بۆ دەستپێکردنی خوێندنی ماستەر و دکتۆرا پلانی زانکۆکانمان وەرگرتووە، ئەوەی ماوەتەوە ئەوەیە لە ئەنجوومەنی وەزارەتی خوێندنی باڵا ڕابگەیێنرێت، بەڵام بۆ ئەم وەرزە فریا ناکەوین، بەڵکو دەکەوێتە وەرزی داهاتوو.

- خولەکانی پێداگۆجی بەردەوامە و نەوەستاوە، تاوەکو ئێستا هیچ کێشەیەکی خولی پێداگۆجی بۆ وەزارەتی خوێندنی باڵا نەهاتووە.

- بەگوێرەی ڕێنمایی نوێ ماوەی مانەوەی قوتابی ماستەر لە دەرەوەی وڵات نۆ مانگە، هەروەها مانەوەی قوتابی دکتۆرا لە 24 مانگەوە بۆ 18 مانگ کەمکراوەتەوە.

- ساڵانە لە وەزارەتی خوێندنی باڵا ئەبدەیت لە لیستی زانکۆکانی دەرەوە بۆ خوێندن دەکرێت، پێویستە ئەو کەسەی ویستی خوێندنی لە دەرەوە هەیە، پێش هەر شتێک تەماشای سایتی وەزارەتی خوێندنی باڵا بکات.