عێراق لەبارەی ڕێککەوتنە ئەمنییەکەی لەگەڵ ئێران؛ وەڵامی ئەمریکا دەداتەوە

ئاڤا نیوز

حکومەتی عێراق لەڕێگەی باڵیۆزەکەی لە واشنتن، وەڵامی ئەمریکا دەداتەوە سەبارەت بە ڕەتکردنەوەی ڕێککەوتنە ئەمنییەکەی ئەم دواییەی نێوان عێراق و ئێران کە واژۆ کرا. دووپاتی دەکاتەوە، عێراق بەگوێرەی بەرژوەندییەکانی ڕێککەوتن لەگەڵ وڵاتان دەکات.

چیرۆکی سەرەکی: عەلی لاریجانی، ئەمینداری نوێی ئەنجوومەنی باڵای ئاسایشی نیشتمانیی ئێران لە میانەی سەردانەکەی بۆ بەغدا، ڕۆژی دووشەممە11ـی ئاب لەگەڵ قاسم ئەعرجی، ڕاوێژکاری ئاسایشی نیشتمانیی عێراق بە چاودێریی سەرۆکوەزیران ڕێککەوتنێکی ئەمنیی پەیوەست بە سنووری نێوانیان واژۆ کرد، واشنتن لەسەر ئەوە هاتە دەنگ و ڕەتیکردەوە.

ڕاگەیێنراوی فەرمی: باڵیۆزخانەی عێراق لە واشنتن لە ڕاگەیێنراوێکدا دووپاتی کردەوە، "عێراق دەوڵەتێکی تەواو خاوەن سەروەرە و مافی ئەوەی هەیە ڕێککەوتن و یاداشتی لێکتێگەیشتن بە پێی بڕگەکانی دەستوور و یاسا نیشتمانییەکانی و بە پێی بەرژەوەندییە باڵاکانی ئەنجام بدات.

لەلایەکی دیکەوە: باڵیۆزی ئێرانیش لە بەغدا دژی هەڵوێستی ئەمریکا هاتە دەنگ و ڕایگەیاند: دەستێوەردانێکی قبوڵنەکراوە لە نێوان دوو دەوڵەتی سەربەخۆی دراوسێ.

پەیوەست بەم بابەتە: ڕۆژی سێشەممە، تامی بروس، وتەبێژی وەزارەتی دەرەوەی ئەمریکا، ڕەتکردنەوەی واشنتنی بۆ یاداشتنامەی لێکتێگەیشتنی ئەمنیی نێوان عێراق و ئێران دەربڕی و جەختی لە دژایەتیی خۆی بۆ هەر یاسایەک کردەوە کە لەگەڵ ئامانجەکانی ئەمریکا ناکۆکە و پێچەوانەی هەوڵەکانی بەهێزکردنی دامەزراوە ئەمنییەکانی ئێستای عێراق بێت.