لە دێرەزوور شەڕ و پێکدادان لەنێوان هێزەکانی سوپای سووریا و هەسەدە ڕوویدا

ئاڤا نیوز

بەرەبەیانی ئەمڕۆ پێنجشەممە، شەڕ و پێکدادان لەنێوان سوپای سووریا و "هێزەکانی سووریای دیموکرات 'هەسەدە' لە شاری دێرەزوور ڕوویدا، هاوکات پێکدادانێکی دیکەش لەنێوان چەکدارانی عەشایەرەکان و هەسەدە لە گوندەوارەکانی ڕۆژهەڵاتی پارێزگاکەدا ڕوویدا.

وێنە گەورەکە: چەند جارێکە هێزەکانی سووریای دیموکرات (هەسەدە) حکومەتی دیمەشق تۆمەتبار دەکات بەوەی کە ئەو گرووپە چەکدارانەی لەلایەن تورکیاوە پشتیوانییان لێدەکرێت و ئێستا لەژێر چەتری حکومەتدان، بەردەوامن لە پێشێلکردنی ئاگربەست لە چەندین ناوچەی باکوور و ڕۆژهەڵاتی سووریا. هاوکات هۆشداریی دابوو کە ئەم هێرشانە هەڕەشە لە ڕێککەوتنی ئاشتی نێوان ئەحمەد شەرع و مەزڵووم عەبدی دەکەن.

بڵاوکراوەی فەرمی: بەگوێرەی تەلەڤیزیۆنی سووریا شەوی چوارشەممە لەسەر پێنجشەممە، پێکدادان بە چەکی سووک و ئاڕ پی جی لەنێوان سوپای سووریا و هەسەدە لەسەر هەردوو کەناری ڕووباری فورات لە لای ڕۆژئاوای شاری دێرەزوور هەڵگیرساوە.

زانیاریی زیاتر: هاوکات، شارۆچکەی غرانیج لە گوندەوارەکانی ڕۆژهەڵاتی دێرەزوور، پێکدادانی تووندی لەنێوان هەسەدە و چەکدارانی هۆزەکانی ناوچەکە بەخۆیەوە بینی. بەهۆی پێکدادانەکانیشەوە زیاتر لە پێنج هاووڵاتیی سڤیل برینداربوون،  باس لە دەستگیرکردنی چوار چەکداری هەسەدە دەکرێت لەلایەن عەشایەرەکانەوە، بەگوێرەی تەلەڤیزیۆنی سووریا.