ئەندامێکی کۆمیتەی ناوەندی: پارتی خەڵكی لەسەر ڕازینەبوون بە ژێردەستەیی ڕاهێناوە

ئاڤا نیوز

ئەندامێكی كۆمیتەی ناوەندیی پارتی دیموكراتی كوردستان ڕایدەگەیەنێت، پارتی پێشەنگ بووە لەوەی خەڵكی لەسەر ڕازینەبوون بەژێردەستەیی ڕابهێنێت؛ لەسەر ئەو بنەمایەش حیزبەكە بڕوای تەواوی بە ئازادی ڕادەربڕین و ڕەخنەگرتن هەیە.

چیرۆکی سەرەکی: سبەی شەممە ڕێككەوتی 16ـی ئابی 2025، پارتی دیموكراتی كوردستان 79ـەمین مۆمی تەمەنی دامەزراندنی دادەگیرسێنێت، وەک گەورەترین حیزب لەسەر ئاستی هەرێمی كوردستان و تەنانەت لەسەر ئاستی عێراقیش، لەنێو سەرجەم حیزبەكان خاوەنی زۆرترین كورسیی پەرلەمانییە.

لێدوانی فەرمی: د. محەممەد خورشید، ئەندامی كۆمیتەی ناوەندی پارتی و بەرپرسی لقی 12ـی هەڵەبجە بە ئاڤا میدیای ڕاگەیاند، یەكێك لە شانازییەكانی مێژووی خەباتی پارتی ئەوەیە؛ خەڵكی فێری ئەوە كرد بە واقیعی ژێردەستەیی ڕازی نەبن.

ئاماژەی بەوەشكرد، ئەو ڕازینەبوون و ڕەخنەگرتنە، جاری وا هەیە بە شانازییەوە لە خودی پارتیش هەیە؛ بەو پێیەی خەڵكی كوردستان هەموو كات پێشبینی و چاوەڕوانیی زیاتریان لە سەركردایەتی سیاسیی پارتی هەبووە و هەیە.

زانیاریی زیاتر: پارتی بە بەستنی 14 كۆنگرە، زۆرترین كۆنگرەی لەنێو سەرجەم حیزبەكانی دیكەی هەرێمی كوردستان و ناوچەكە بەستووە، كە لەسەرجەم كۆنگرەكاندا دەرفەتی بە هاتنەپێشی كادیری نوێ دراوە و دەرگا بۆ ڕەخنە و پێشنیازی نوێ كراوەتەوە.