سەرۆکى پارتى هێزەکانى لوبنان: وتارەکەی ئەمینداری گشتيی حیزبوڵڵا هەڕەشەیە بۆ سەر لوبنان

ئاڤا نیوز

سەرۆکى پارتى هێزەکانى لوبنان لێدوانێکی ئەمینداری گشتی حیزبوڵڵای لوبنان ڕەتدەکاتەوە و دەڵێت " وتارەکەی نەعیم قاسم هەڕەشەیەکی ڕاستەوخۆیە بۆ سەر هەموو لوبنانیەک".

چیرۆکی سەرەکی: رۆژی هەینی 2025-08-15، نەعیم قاسم، ئەمینداری گشتیی حیزبوڵڵای لوبنان، ڕایگەیاندبوو، بەرەی مقاوەمە بەهیچ شێوەیەک ئامادەنییە چەک ڕادەستی هچ لایەنێک بکات و یان دەبێت پێکەوە بژین، یان دەبێت هەموومان بەیەکەوە ماڵئاوایی لە دنیا بکەین.

لێدوانی فەرمی: سەمیر جەعجەع، سەرۆکى پارتى هێزەکانى لوبنان ڕایگەیاند: وتار و لێدوانەکانی ئەمینداری گشتیی حیزبوڵڵای لوبنان لە پلەی یەکەمدا هەڕەشەیەکی ڕاستەوخۆیە بۆ سەر حکومەتی لوبنان، لە پلەی دووەمدا بۆ سەر ئەو زۆرینە پەرلەمانییەی کە متمانەی بەم حکومەتە داوە، و هەروەها بۆ سەر سەرجەم دامەزراوە دەستوورییەکانی لوبنان، لە سەرووی هەمووشیانەوە سەرۆکایەتیی کۆمار و سەرۆکایەتیی حکومەت."

زانیاریی زیاتر: جەعجەع ئاماژەی بەوەکرد، ئەو قۆناغەی تێیدا دەژین، قۆناغێکی دامەزرێنەرانەی گرنگە و هەموو خەڵکی لوبنان لە پشت دامەزراوە فەرمییەکان دەوەستن چیتر ڕێگە نادەن هیچ کەس و لایەنێک جارێکی دیکە شکستی پێ بهێنێت.

ئەوەی پێویستە بیزانیت:  حکومەتی لوبنان بەسەرۆکایەتیی نەواف سەلام، 2025-08-05، سوپای وڵاتەکەی ڕاسپارد بۆ ئامادەکردنی پلانێک بۆ چەککردنی حیزبوڵڵای لوبنانی و سنووردارکردنی چەک تەنیا لە دەستی هێزە ئەمنی و سەربازییەکانی دەوڵەت.