پووتین: بۆ چارەسەری کێشەی ئۆکراینا پێویستە سەرچاوەی قەیرانەکە چارەسەر بکرێت

ئاڤا نیوز

سەرۆکی ڕووسیا هیوای خواست ئەو لێکتێگەیشتنەی لەگەڵ هاوتا ئەمریکییەکەی پێی گەیشتووە، ببێتە هۆی دابینکردنی ئاشتی و ئارامی.

چیرۆکی سەرەکی: بۆ کۆتاییهێنان بە شەری سێ ساڵەی نێوان ڕووسیا و ئۆکراینا، ڕۆژی هەنی هەریەکە لە دۆناڵد ترەمپ، سەرۆکی ئەمریکا و ڤلادیمێر پووتین، سەرۆکی ڕووسیا لە ئالاسکا کۆبوونەوە.

لێدوانی فەرمی: دوای کۆبوونەوەی لەگەڵ دۆناڵد ترەمپ، سەرۆکی ئەمریکا، ڤلادیمێر پوتین، سەرۆکی ڕووسیا، لە کۆنگرەیەکی ڕۆژنامەوانیدا ناوەڕۆکی دیدارەکەی خستەڕوو، ایگەیاند کە دۆخی ئۆکراینا تەوەری سەرەکی گفتوگۆکانیان بووە و هیوای خواست ئەو لێکتێگەیشتنەی لەگەڵ ترەمپ پێی گەیشتوون، ببێتە هۆی دابینکردنی ئاشتی.

زانیاریی زیاتر: سەرۆکی ڕووسیا دیدارەکەی بە "بونیادنەر" و "پڕ لە ڕێزی بەرامبەر" وەسف کرد و ڕایگەیاند، "نزیکەی چوار ساڵە دیداری ئاستی باڵا بۆ پەرەپێدان بە پەیوەندییەکان ئەنجام نەدراوە، ئەمەش ماوەیەکی دوور و درێژە. پەیوەندییەکانمان گەیشتووەتە نزمترین ئاستی خۆی لەوەتەی جەنگی ساردەوە، کە ئەمە نە بۆ وڵاتەکەمان و نە بۆ جیهانیش باش نییە. درەنگ یان زوو، پێویستە ئەم دۆخە هێور بێتەوە و بگەڕێینەوە سەر مێزی دانوستان."

پوتین جەختی کردەوە، "دۆخی ئۆکراینا تەوەری سەرەکی دیدارەکەمان بوو. دەبینین کە ئەمریکا و ئیدارەی ترەمپ هەوڵ دەدەن بۆ چارەسەری قەیرانی ئۆکراینا. هیوادارم ئەو لێکتێگەیشتنەی لەگەڵ ترەمپ پێی گەیشتین، ببێتە هۆی گەیشتن بە ئامانجەکانمان و ڕێگەی ئاشتی دەستەبەر بکات."

ناوبراو ئاماژەی بەوەش کرد کە ڕووداوەکانی ئۆکراینا ڕاستەوخۆ کاریگەرییان لەسەر ئاسایشی ڕووسیا هەیە و وتی: "ئێمە خەڵکی ئۆکراینا وەک خوشک و برای خۆمان دەبینین، چونکە ڕیشەی ئێمە یەکە. هەر ڕووداوێک لەوێ ڕووبدات، بۆ ئێمە تراژیدی و ژانێکە، بۆیە خوازیاری کۆتاییهاتنی ئەو دۆخەین."

تیشکی خستە سەر ڕێگەچارەی هەمیشەیی بۆ قەیرانەکە و ڕایگەیاند: "چارەسەری هەمیشەیی، بریتییە لە نەهێشتنی سەرچاوەی قەیرانەکە، لەبەرچاوگرتنی نیگەرانییەکانی ڕووسیا و دەستەبەرکردنی ئاسایشێکی دادپەروەرانە بۆ ئەوروپا و جیهان." هەروەها هیوای خواست "ئۆکراینا و وڵاتانی ئەوروپا هەوڵ نەدەن لە ڕێگەی ئاژاوەی پشت پەردەوە ئەو پێشکەوتنانە بەلاڕێدا بەرن."