ئەوروپا ئامادەکاری بۆ قۆناغی نوێی ئاشتیی ئۆکراینا دەکات

ئاڤا نیوز

کۆشکی ئێلیزێی فەرەنسا وادەی کۆبوونەوەی سەرۆکی فەرەنسا، سەرۆکوەزیرانی بەریتانیا و ڕاوێژکاری ئەڵمانیا سەبارەت بە داهاتووی ئۆکراینا ڕاگەیاند.

وێنە گەورەکە: دوای کۆبوونەوەی ئەلاسکا لە نێوان دۆناڵد ترەمپ، سەرۆکی ئەمریکا و ڤلادیمێر پوتین، سەرۆکی ڕووسیا سەبارەت بە جەنگی ئۆکراینا کۆبوونەوەی لووتکەی ئەوروپا بەشێوەی ڤیدیۆیی بەڕێوەدەچێت.

ڕاگەیێنراوی فەرمی: کۆشکی ئیلیزێی فەرەنسا بڵاویکردەوە، ئیمانوێل ماکرۆن، سەرۆکی فەرەنسا و کیێەر ستارمەر، سەرۆکوەزیرانی بەریتانیا و فریدریش مێرتز، ڕاوێژکاری ئەڵمانیا ڕۆژی یەکشەممە کۆبوونەوەیەکی ڤیدیۆیی لەگەڵ "هاوپەیمانیی ئارەزوومەندان"ی پشتیوانیکاری کیێڤ ئەنجام دەدەن، بە مەبەستی ئامادەکاری بۆ قۆناغەکانی داهاتووی گفتوگۆکانی ئاشتی سەبارەت بە ئۆکراینا.

ئاماژەبەوەشکراوە، ئەم کۆبوونەوەیە دوابەدوای کۆبوونەوەی ئەلاسکا و پێش سەردانەکەی ڤۆلۆدیمێر زێلێنسکی، سەرۆکی ئۆکراینا بۆ واشنتن لە 18ی مانگی هەشتە.

زانیاریی زیاتر: چاوەڕوان دەکرێت لەم کۆبوونەوەیەدا، هاوپەیمانانی ئۆکراینا تاوتوێی ئەو گەرەنتییە ئەمنییانە بکەن کە لە چوارچێوەی ڕێککەوتنێکی ئاشتیی ئەگەرییدا پێشکەش بە کیێڤ دەکرێت.

ئەوەی پێویستە بیزانیت: هاوپەیمانیی ئارەزوومەندانی پشتیوانیکاری کیێڤ زۆربەی وڵاتە گەورەکانی ئەوروپا، یەکێتیی ئەوروپا، ناتۆ و چەند وڵاتێکی دەرەوەی ئەوروپا وەک کەنەدا لەخۆدەگرێت.