لە پەرلەمان واژۆ بۆ دەنگدان لەسەر پرۆژەیاسای دەستەی حەشدی شەعبی کۆدەکرێتەوە

ئاڤا نیوز

پەرلەمانتارانی شیعە دەستیان کردووە بە کۆکردنەوەی واژۆ لەپێناو دەنگدان لەسەر پرۆژەیاسای دەستەی حەشدی شەعبی و دەستەکە داوا لە پەرلەمانتاران دەکات بە جلی حەشدەوە بچنە پەرلەمان و دەنگبدەن.

چیرۆکی سەرەکی: سەرەڕای گوشارە ناوخۆیی و دەرەکییەکان دژی تێپەڕاندنی پرۆژەیاسای دەستەی حەشدی شەعبی، لایەنە شیعەکان لە پەرلەمانی عێراق داوا دەکەن بە زووترین کات پەرلەمان دابنیشێت و پرۆژەیاساکە کە دووجار خوێندنەوەی بۆ کراوە، پەسەند بکرێت.

ڕاگەیێنراوی فەرمی: عەلا حەیدەری، ئەندامی پەرلەمانی عێراق ڕایگەیاند: دەستمانکردووە بە کۆکردنەوەی واژۆ لە پێناو ئەنجامدانی دانیشتنێکی پەرلەمان بۆ دەنگدان لە پرۆژەیاسای دەستەی حەشدی شەعبی و داوا لە پەرلەمانتارەکانی دیکە دەکەین بەشدار بن لە واژۆکردنی لەسەر داواکارییەکە.

لەلایەکی دیکەوە: ئیبتیسام هیلالی، پەرلەمانتاری چوارچێوەی هەماهەنگی ئاشکرای کردووە، تاوەکو ئێستا زیاتر لە 100 واژۆ لە پەرلەمان کۆکراوەتەوە و داواکارییەکەش ئاراستەی سەرۆکایەتی پەرلەمان دەکرێت بۆ دیاریکردنی وادەیەک بۆ دیاریکردنی وادەی دانیشتنی پەرلەمان و دەنگدان لەسەر پرۆژەیاسای دەستەی حەشدی شەعبی.

لێدوانی فەرمی: سەگڤان سندی، ئەندامی لیژنەی ئاسایش و بەرگریی پەرلەمانی عێراق بە ئاڤا میدیای ڕاگەیاند: پرۆژەیاساکە نزیکەی 20 ڕۆژە لە سەرۆکایەتیی پەرلەمانە، بەڵام بەهۆی ناکۆکیی ناوخۆ و گوشارە دەرەکییەکان نەخراوەتە کارنامەی دانیشتنەکانی پەرلەمان.

زانیاریی زیاتر: بە گوتەی سندی، گرووپە چەکدارەکانی وەکو؛ حیزبوڵڵا، عەسائیبی ئەهلی حەق، نوجەبا و کەتیبەکانی ئیمامی عەلی و بەشێکی دیکەش گوشارێکی زۆر دەکەن بۆ ئەوەی پرۆژەیاساکە پەسەند بکرێت.