سوپای ئیسرائیل: دامەزراوەیەکی وزەی حوسییەکانمان لە یەمەن کردووەتە ئامانج

ئاڤا نیوز

سوپای ئیسرائیل لە هێرشێکی ئاسمانیدا هێرشی کردە سەر ژێرخانی وزەی حوسییەکان لە یەمەن و دەڵێت، ئەمە وەڵامی هێرشی حوسییەکانە بۆسەر ئیسرائیل.

وێنە گەورەکە: لە سەرەتای جەنگی غەززەوە لە 7ی مانگی 10ی 2023، حوسییەکان وەک پشتیوانییەک بۆ غەززە بەردەوام مووشەکی بالیستی و فڕۆکەی بێفڕۆکەوان ئاراستەی ئیسرائیل دەکەن. هەروەها لە دەریای سووردا هێرش دەکەنە سەر ئەو کەشتییە بازرگانییانەی کە بە وتەی خۆیان پەیوەندییان بە ئیسرائیلەوە هەیە.

ڕاگەیێنراوی فەرمی: سوپای ئیسرائیل لە بەیاننامەیەکدا ڕایگەیاند، هێرش کراوەتە سەر ئامانجە تیرۆریستییەکان لە قوڵایی یەمەن و ژێرخانی وزەی حوسییەکان لە ناوچەی سەنعای پایتەخت.

ئاماژە بەوەشکراوە، ئەم هێرشانە لە وەڵامی هێرشە بەردەوامەکانی حوسییەکان دژی ئیسرائیل و هاووڵاتیانی ئەنجامدراوە، لەوانەش هەڵدانی مووشەکی زەوی بە زەوی و فڕۆکەی بێفڕۆکەوان.

لێدوانی فەرمی: ئیسرائیل کاتز، وەزیری بەرگریی ئیسرائیل ڕایگەیاند، حوسییەکان باجێکی قورس دەدەن بۆ هەر هەوڵێک بۆ هێرشکردنە سەر ئیسرائیل، "هەروەها گەمارۆی ئاسمانی و دەریاییمان بەسەریاندا سەپاندووە، ئەمە تەنیا سەرەتایە و لە قۆناغی داهاتوو هێرشەکانیان بەهێز و بەئازار دەبن".

لەلایەکی دیکەوە: کەناڵی مەسیرەی سەر بە حوسییەکان لە زاری بەرگریی شارستانییەوە بڵاوی کردەوە، لە هێرشەکەدا وێستگەی بەرهەمهێنانی کارەبای حزیزی لە ناوچەی سنحان لە باشووری سەنعای پایتەخت کراوەتە ئامانج.