ئەمساڵ زیاتر لە 100 کورد لە ئێران لەسێدارە دراون

ئاڤا نیوز

لە هەشت مانگی ڕابردوودا 800 هاووڵاتی لە ئێران لەسێدارە دراون، لەو ژمارەیە 116 کەسیان کورد بوون و بەشێکیان بەندکراوی سیاسیی بوون.

وێنە گەورەکە: بەراورد بە ساڵانی ڕابردوو، بە دیاریکراویش لە دوای جەنگی نێوان ئیسرائیل و ئێران، ڕێژەی لە سێدارەدان لە ئێران بەرزبووەتەوە و ڕۆژانە لەنێو گرتووخانەکانی ئەو وڵاتەدا سزای لەسێدارەدان بەسەر خەڵکیدا دەسەپێندرێت، ئەمەش نیگەرانی لە لای خەڵک و ڕێکخراوەکانی تایبەت بە مافی مرۆڤ دروست کردووە.

ژمارەکان وا دەڵێن: بە پێی ئاماری تۆمارکراو لە ناوەندی ئامار و بەڵگەنامەکانی ڕێکخراوی مافی مرۆڤی هەنگاو، لە سەرەتای ئەمساڵەوە بە تۆمەتی جیاواز 800 کەس لەلایەن کۆماری ئیسلامیی ئێرانەوە لەسێدارە دراون، کە 22 ژن و منداڵێکی خوار 18 ساڵی تێدا بووە.

لێدوانی فەرمی: ئەرسەلان یار ئەحمەدی، سەرۆکی ڕێکخراوی مافی مرۆڤی هەنگاو بە ئاڤای وت، لەو ژمارەیە 116 کەسیان کورد و 107 کەسیان لوڕ بوون، 92 کەسیان بەلووچ و 82 کەسی دیکە تورک، 46 کەسیش خەڵکی ئەفغانستان بوون.

ئەوەی پێویستە بیزانیت: بە گوتەی ئەرسەلان یار ئەحمەدی، ئێستا نزیکەی 70 بەندکراوی سیاسیی کورد لە زیندانەکانی کۆماری ئیسلامیی ئێراندان، بڕیاری لەسێدارەدانیان بۆ دەرچووە.