پڕۆژەیەکی دیکەی پاراوکردنی ئاوی ژێر زەوی جێبەجێ دەکرێت

 

پرۆژەیەکی دیکەی پاراوکردنی ئاوی ژێر زەوی لە سنووری ئاکرێ دروست دەکرێت و ئاڤا میدیا شوێنی پرۆژەکە ئاشکرا دەکات.

 

وێنە گەورەکە: گۆڕانی کەشوهەوا کاریگەریی لەسەر کەمبوونی ئاوی سەر زەوی و ژێر زەوی هەبووە، ئەمە وەک مەترسییەکی جیهانی بینراوە و هەرێمی کوردستان بەدەر نییە لێی، بۆیە حکومەتی هەرێمی کوردستان لەڕێگەی "پاراوکردنی ئاوی ژێر زەوی" هەوڵی پاراستنی ئاوی سەر زەوی و بووژانەوەی ئاوی ژێر زەوی دەدات. 

 

لێدوانی فەرمی: د. کاروان سەباح هەورامی، بەڕێوەبەری گشتیی سەرچاوەکانی ئاو لە وەزارەتی کشتوکاڵ بە ئاڤای وت، پرۆژەکە ناوی "کۆلەکی مەزن"ـە و دیزاینەکەی تەواو بووە، لە گوندی کۆلەکی مەزن لە سنووری ناحیەی گردەسێن لە ئاکرێ دروست دەکرێت، بەم زووانە دەست بە جێبەجێکردنی دەکرێت.

 

زانیاریی زیاتر: تیمی سەرچاوەکانی ئاو لە وەزارەتی کشتوکاڵ کار لەسەر پرۆژەکە دەکەن، ڕێکخراوی WFP پاڵپشتی دارایی پڕۆژەکەی لە ئەستۆ گرتووە.

 

ئەوەی پیویستە بیزانیت: بە تەواوبوونی پرۆژەکە، ژمارەی پڕۆژە تەواوبووەکان لە سنوورە دەگاتە حەوت پرۆژە. 

 

ژمارەکان وا دەڵێن: پرۆژەکانی پاراوکردنی ئاو ئەمانەن: 

یەکەم: پڕۆژەی پاراوکردنی ئاوی ژێر زەوی لە باسرمە بە گوژمەی 199 ملیۆن و 325 هەزار دینار جێبەجێکرا و مانگی 12ـی ساڵی 2023 تەواو بووە.

دووەم: پڕۆژەی گوندی کۆلەکی بچووک-کەسنەزان بە گوژمەی 150 ملیۆن دینار جێبەجێکرا و مانگی یەکی ئەمساڵ تەواو بوو.

سێیەم: پرۆژەی دروستکردنی بەربەستی گابیۆن لە بیۆکەی بچووک-بنەسڵاوە بە گوژمەی 83 ملیۆن و 500 هەزار دینار جێبەجێکرا، مانگی چواری ئەمساڵ تەواو بوو.

چوارەم: پرۆژەی دروستکردنی بەربەستی گابیۆن لە گوندی شووش-ئاکرێ بە گوژمەی 67 ملیۆن دینار جێبەجێکرا و مانگی شەشی ئەمساڵ تەواو بوو.

پێنجەم: پرۆژەی پاراوکردنی ئاوی ژێر زەوی دارەتوو-هەولیر بە گوژمەی 67 هەزار و 710 دۆلار جێبەجی کرا و مانگی 11 ساڵی 2023 تەواو بووە.

شەشەم: پرۆژەی پاراوکردنی ئاوی ژێر زەوی لە تارین-هەولێر، بە گوژمەی 78 هەزار و 887 دۆلار جێبەجێ کرا و مانگی 11 ساڵی 2023 تەواو بووە.

حەوتەم: پرۆژەی پاراوکردنی ئاوی ژێر زەوی لە ئاکرێ-کۆلەکی مەزن دەست بەجێبەجێکردنی دەکرێت.

 

بۆچی گرنگە: پرۆژەی پاراوکردنی ئاوی ژێر زەوی، ئاوی زیادەی سەر زەوی لەڕێگەی تەکنیکێکی جیاوازەوە دەخاتە نێو خەزانەکانی ژێر زەوییەوە، بەمەش لەکاتی پێویست بەکارەدەهێنرێت و سوودی لێوەردەگیرێت.