فەیسبووک بە سیخوڕیکردن بە سەر سناپچاتەوە تۆمەتبار دەکرێت

ئاڤا نیوز

بە گوێرەی بەڵگەنامەیەک کۆمپانیای فەیسبووک، کە ئێستا وەک مێتا دەناسرێت، لە نێوان ساڵانی 2016 تا 2019 سیخوڕیی بە سەر داتای بەکاربەرانی سناپچاتەوە کردووە. مێتا ئەو تۆمەتانە ڕەتدەکاتەوە و بە بێ بنەما ناوی دەبات.

وێنە گەورەکە: بەڵگەنامەی دادگایەکی کالیفۆرنیا سەبارەت بە دۆسیەیەک کە لە دژی کۆمپانیای تەکنۆلۆژیای (Bay Area) تۆمار کراوە، ئاماژە بەوە دەدات کە فەیسبووک لە ڕێگەی ئەپڵیکەیشنی (Onavo)ـەوە چووەتە ناو ئامێرەکانی ئایفۆن و ئەندریۆد و پشکنینی بۆ ترافیکی داتا و زانیارییەکانی بەکاربەران کردووە. فەیسبووک ئەم کارەی لە چوارچێوەی پڕۆژەیەکدا بە ناوی (ڕاوکەری تارمایی) ئەنجام داوە، ئەمەش وەک ئاماژەیەک بۆ لۆگۆی تارماییەكی سپی کە سناپچات بەکاریدەهێنێت. 

زانیاریی زیاتر: بەڵگەنامەکە لە مانگی ئایاری 2023 ئامادە کراوە، بەڵام ئەو کات ئاشکرا نەکراوە و بڵاو نەکراوەتەوە. هەر بە گوێرەی ئەم بەڵگەنامەیە، فەیسبووک تۆمەتبار کراوە بەوەی بازاڕی سۆشیاڵ میدیای قۆرخ کردووە. 

ئەوەی پێویستە بیزانیت: فەیسبووک سەیری وێنە و گفتوگۆکانی بەکاربەرانی سناپچاتی نەکردووە، بەڵام لە ڕێگە سۆفتوێرێکەوە هەوڵیداوە شیکار بۆ ڕەفتار و داتای بەکاربەران بکات، تا ئەو زانیارییانە وەک کۆد لە سوودی فەیسبووک بەکار بهێنێت.