پەیمانگایەکی نێودەوڵەتی: ئێران پاشماوەی چالاکییە ئەتۆمییەکانی پاک دەکاتەوە

ئاڤا نیوز

پەیمانگای زانست و ئاسایشی نێودەوڵەتی ڕایگەیاند، کۆماری ئیسلامیی ئێران هەنگاوەکانی خێراکردووە بە ئاراستەی پاککردنەوە و سڕینەوەی بەڵگەنامەی ئەو شوێنانەی کە چالاکییە ئەتۆمییەکانی تێدا ئەنجامداوە، بەتایبەتی لە بنکەی ئەتۆمیی "لویزان" لە باکووری تاران.

چیرۆکی سەرەکی: بەپێی ڕاپۆرتێکی پەیمانگاکە، ئێران دەستی کردووە بە ئۆپەراسیۆنێکی خێرا و بەرفراوانی پاککردنەوە لە پێگەی ئەتۆمی لویزان، کە لە کاتی جەنگی 12 ڕۆژەدا (لەگەڵ ئیسرائیل) دووجار کرابووە ئامانج.

پەیمانگای زانست و ئاسایشی نێودەوڵەتی ڕوونیکردووەتەوە کە "تاران هەوڵی پاککردنەوەی پێگەی ئەتۆمیی لویزان دەدات و گومان دەکرێت ئەم هەنگاوە بە ئامانجی سڕینەوەی بەڵگەی هەر کارێکی پەرەپێدانی چەکی ئەتۆمی بێت."

بۆچوونی لایەنی بەرامبەر: ئەم ڕاپۆرتە لە کاتێکدایە کە ئێران بەردەوام ڕەتیدەکاتەوە بەدوای چەکی ئەتۆمییەوە بێت و جەخت دەکاتەوە کە بەرنامە ئەتۆمییەکەی تەنیا بۆ مەبەستی ئاشتییانەیە، وەک بەرهەمهێنانی کارەبا و بەکارهێنان لە بواری پزیشکیدا. بەڵام وڵاتانی ڕۆژئاوا و ئیسرائیل گومانیان هەیە و پێیان وایە تاران بە نهێنی کار بۆ پەرەپێدانی چەکی ئەتۆمی دەکات.

لەلایەکی دیکە: پەیمانگاکە پێیوایە چالاکییەکانی ئێستا لە لویزان دەکرێت هەوڵێک بێت بۆ شاردنەوەی بەڵگە و زانیارییە گرنگەکان لە ئاژانسی نێودەوڵەتیی وزەی ئەتۆم (IAEA) و کۆمەڵگای نێودەوڵەتی.