ئێران ئامادەیی خۆی بۆ کەمکردنەوەی پیتاندنی یۆرانیۆم دەربڕی

ئاڤا نیوز

وتەبێژی وەزارەتی دەرەوەی ئێران لەبارەی کەمکردنەوەی ئاستی پیتاندنی یۆرانیۆم دەڵێت؛ بۆ ئەوەی بگەین بە ڕێککەوتن دەکرێت ئەم کارە ئەنجام بدرێت.

چیرۆکی سەرەکی: تاران و واشنتن لەمانگی نیسانەوە پێنج گەڕی دانوستانی ناڕاستەوخۆیان ئەنجامداوە لەسەر پرسی ئەتۆمی ئێران، لەسەروبەندی ئامادەکاری بۆ گەڕی شەشەمی دانوستان، ئیسرائیل لە مانگی حوزەیران هێرشی بۆ سەر ئێران ئەنجامدا و دواتریش ئەمریکا هەرسێ بنکە ئەتۆمییەکانی نەتەنز و ئەسفەهان و فۆردۆی بە ئامانج گرت.

لێدوانی فەرمی: ئیسماعیل بەقائی، وتەبێژی وەزارەتی دەرەوەی ئێران بە ڕۆژنامەی گاردیانـی بەریتانی ڕاگەیاندووە: ''تاران ئامادەیە ڕێژەی پیتاندنی یۆرانیۆم بۆ 3.67% کەمبکاتەوە، کە ئەمەش ئەو ئاستەیە لە ڕێککەوتنی پێشووی ئەتۆمیی دانرابوو، بەڵام بە مەرجێک ڕێککەوتنێکی گشتگیر بکرێت کە مافی ئێران بۆ پیتاندنی ناوخۆیی بپارێزێت.''

 زانیاریی بەدەستهاتوو: بەقائی پرسیاری ئەوە دەکات بۆچی ئەمریکا پێداگرە لەسەر هەڵوەشاندنەوەی مافی پیتاندنی یۆرانیۆمی ئێران، لە کاتێکدا وەک دۆناڵد ترەمپ، سەرۆکی ئەمریکا خۆی دەڵێت، بەهۆی ‌هێرشەکانی ئەمریکاوە بۆ سەر ئێران ئەو بنکانە لەناوچوونە.